Siumup Naleraq avannaani ernumaginngilaa

- Siullermik tassa eqqartuiffiginikuunngilarput. Aatsaat aqagu telefuunikkut ataatsimiittussaavugut avannaani ataqatigiissaarisut. Kisianni taamaakkaluartoq isumaqarpunga uani siullermik tusaatissatut tiguinnagassaasoq aammalu ataqqillugu Hansip taamatut partiiliorniarnera, Siumup avannaani immikkoortortaqarfiisa ataqatigiissaarisuanni siulittaasoq Kangaatsiameersorlu, Jakob Ludvigsen, oqarpoq.

Inatsisartunut siorna qinersisoqarmat Siumut Qaasuitsup Kommuniani 4772-inik qinerneqarpoq:

- Kisianni isumaqarpunga piviusut aallaavigalugit aammalu sunniuteqarsinnaanera eqqarsaatigissagaanni ernumanartortaqanngitsoq Siumup qinersisartuinik tigooqqaasinnaaneranik. Uani imminermini sunniuteqaqataasinnaanini, Hansip, tassani qimarratigereerpaa. Taamaammat allatut sunniuteqarsinnaanera killilerujussuanngortussaavoq partiilioraluaruniluunniit. Imaluunniit qinersisartunik apeqqutaaginnarpoq qanoq suleqatissaqartiginersoq, Jakob Ludvigsen oqarpoq.

Ilisimaneqartutut Hans Enoksen Inatsisartunut siorna qinersisoqarmat Siumumi qinerneqarnerpaat tulleraat, taamani 632-nik qinerneqarluni Aleqa Hammondimut 6818-inik qinerneqartumut tulliugami.

Hans Enoksenip Inatsisartunut qinersinermi 632-nik qinersisimini 382-it Qaasuitsup Kommuniani taasisorai:

- Aamma uani periuseq ilisimaarereerparput Hansip periuserisartagaa pipallatanik aalangiisarneq. Taakkulu kinguneri aamma pitsaasanngitsut nalunngereerpagut. Aamma siusinnerusukkut aqutsinerata nalaani tamanna aalisarnermut tunngasuni ilisimaarereerparput. Taakkuuppullu qimarratigineqartut. Aaqqiiniarnermi periarfissatsialani atorluanngilaa Hansip. Qimarratigivai sunniuteqarsinnaajunnaarnissarlu qinerlugu, Jakob Ludvigsen oqarpoq.