Assi: ILISIMATUSARFIK

Siumup naammaginanngitsumik iliuuseqarnera Dorisip tunuartariaqarneranik kinguneqarpoq

Siumup naammaginanngitsumik iliuuseqarnera Doris J. Jensenip tunuartariaqarneranik kinguneqarpoq, Ilisimatusarfimmi Inuiaqatigiilerinermik, Aningaasaqarnermik Tusagassiornermillu ilisimatusarfimmi adjunkti Rasmus Leander taama isumaqarpoq.

Taanna naapertorlugu, 6.855 koruunit nalinginut atornerluisoqarsimanera Doris J. Jensenip tunuarneranik kinguneqartariaqanngikkaluarpoq. Rasmus Leander Nielsen naapertorlugu aningaasat atornerlunneqartut amerlassusaat naalakkersuisutullu tunuartariaqarneq toqqaannartumik imminnut attuumassuteqanngillat. 

- Suliammi allat millionerpassuarnik aningaasartaqaraluartut ministerit tamanit tapersersorneqartartut takusarpagut, Rasmus Leander Nielsen taama oqarpoq, taanna isumaqarpoq Doris J. Jensenip tunuarnera allamik peqquteqarsinnaasoq.

AAMMA ATUARUK Dorisimut tatiginninngittoqarnera Kim Kielsenip pakatsissutigaa

- Tunuartariaqarneranut pissutaanerpaasut marluupput. Siulleq tassaavoq Siumup tungaanit naammaginanngilluinnartumik iliuuseqarfigineqarnera. Ima paasillugu, suliaq pitsaanerungaatsiartumik iliuuseqarfigineqarsimasariaqaraluarpoq, soorlu assersuutigalugu '17-imi ataatsimiititaliamut suliassanngortinneqarsimasinnaagaluarpoq, suliaq tassani naammassineqartussanngorlugu. Taassuma (DJJ, aaqq.)) ippassaq oqaatigaa peqqissimissutissaqarani allanillu, taamaammat suliaq taamanili aaqqiissuteqarfigisinnaasimagaluarpaa.

Illuatungiliuttut Inuit Ataqatigiit tatiginnikkunnaarnermik taasinissaminnut arlaannik susoqarnissaanik utaqqiinnartutut inissisimaruttortut, Siumup partiitut immikkut iliuuseqannginnera ajornerulersitsivoq:

AAMMA ATUARUK Kim Kielsenip nammineq iliuuserisani pakatsissutigisariaqaraluarpai

- Uanga ima paasivara, tatiginnikkunnaarnermik taasititsinissaminnut atugassaminnik utaqqiinnarsimasut. Taamaammat pisoq Sermitsiamit allaaserineqalermat ingerlaannaq qisuariarsimannginnini pisullu pitsaanerusumik paasissutissiissutigisimannginnera akisunaarpaa, aamma isumaqarpunga Kim Kielsenip suliaq pilertornerusumik iliuuseqarfigisimasariaqaraluaraa naalakkersuisutullu tapersersorlugu. Naalakkersuisunimi siuttunut qaninnerit ilaanniippoq, taamaammat aamma qaammatini kingullerni pisunut tunngatillugu doris maanna aamma tunuartariaqalernera Kim Kielsenimut ajorsartitaaneruvoq annertooq.

Nunatsinnili inuiaqatigiit anigaasaataannik politikki aqqutigalugu atornerluisarnerup takornartaannginnera taassuma tupigusuutigaa.

AAMMA ATUARUK Erik Jensen overtager efter Doris J. Jensen

- Taamaattoqartarnera tamat oqartussaaqataanerat inuillu tatiginninnerat eqqarsaatigalugit ulorianarsinnaavoq. Suliallu taamaattut inunnit qanoq isumaqarfigineqarnersut naluneqanngikkaluartoq suliat taakkua taama saqqummikulatigisarnerat tupigusuutigineqarsinnaavoq.

Doris J  Jensenip naalakkersuisutut tunuarnera Naalakkersuisut Kim Kielsenip siuttuuffigisaata inatsisartuni tapersersorneqarnerinut  allannguuteqartitsissanngitsoq Rasmus Leander Nielsenip aamma oqaatigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl