Siumup Inuusuttunut Suliniaqatigiiffia: Peqquserluttoqarsimanera iliuuseqarfigineqartariaqarpoq
- Inatsisartuni peqquserlulluni taasisoqartarsimanera akuerisinnaanngilluinnarparput. Iliuuseqarfigisariaqarpoq peqquserluttullu paasineqartariaqarput. Tamanna inatsisaattunut sakkortuumik kinguneqartinneqartariaqarpoq, aamma parteeqatigigaluarutsigilluunniit, Siumup Inuusuttunut Suleqatigiiffiata siulittasua Benjamin Kielsen allappoq.
Inatsisartut teknikki nutaaq atorlugu ukiaq manna atuutilersumik taasisalerput, attataasaq tuuginnartaleramikku. Naak Inatsisartut suleriaasianni erseqqilluinnaraluartoq, ilaasortat taaseqataassagunik inersuarmiittariaqartut, periaaseq nutaaq atornerlunneqartarsimasoq, Radioavisimit saqqummiunneqarpoq, ilaasortat inersuarmiinngitsut taasisinneqartarsimammata.
Tamatuma kingunerisaanik taasisitsinerni periaatsit sukaterneqarput, kikkut taasisinnaatitaanersut qulakkeeqqaarniarneqartalerluni.
- Pisoq erloqinartoq Nunatsinnullu isiginninnermut sakkortuumik eqquisinnaasoq nipangiutiinnarutsigu demokrati eqqornerlunneqassaaq, Siumup Inuusuttunut Suleqatigiiffiata siulittasua Benjamin Kielsen allappoq.
