Siumup inuusuttai peqataarusupput

aggustip 26-at 2005 11:28

Siumut inuusuttai isumaqarput Naalakkersuisunik toqqaaniarnermi peqataatinneqartariaqarlutik.

Siumup Inuusuttaani siulittaasoq, Mads Petersen ima oqarpoq.

- Naluneqanngitsutuut maannakkumut Naalakkersuisut toqqarneqartartut Hans-ip toqqartarnikuuai. Taamaalilluta uagut isumaqarpugut, Siumukkormiut uagut ataatsimoorluta, taavalu suleqatigiilluta, Naalakkersuisunik toqqaasalissalluta, SIS-ip siulittaasua Mads Petersen oqarpoq. Mads Petersen aperaarput, Hans Enoksen-ip siornatigut naalakkersuisussatut toqqaasarsimanera tatiginannginnersoq, Mads Petersen-lu ima akivoq:- Soorunami oqaatigissavara, Naalakkersuisunngortarsimasut ajunngitsumik sulinissaannik kissaattarsimagigut, kisianni ajoraluartumik naalakkersuisut namminneerlutik akisussaaffimminnik paarsilluartarsimannginnermikkut kukkunermikkulluunniit tatiginassusertik aserortarsimavaat. Taamaasilluni Hansip toqqaasarsimanera ataqqinaraluartoq, naalakkersuisuusarsimasut tatiginassusertik aserortarsimavaat. Taamaammat isumaqarpunga maannakkut toqqaanissami siumukkuulluta ataatsimorluta toqqaasariaqarluta, inuiaqatigiinnut taavalu siumukkormiuunermut nukittorsaataasinnaammat.

Mads Petersen aamma oqarpoq kaajallattaasitat siornatigut sukaterneqarnikuunngitsut maannakkut sukaterneqalermata iluaqutaassaqisoq, siusinnerusukkullu taamatut sukaterisoqarsimagaluarpat, naalakkersuisut kukkusarneri pisarsimanavianngitsut, aamma maannakkut siumukkut ataatsimoorussillutik suleqatigiillutik Naalakkersuisunik toqqaasoqarnissaa Mads Petersen-ip qularutiginninnerarpaa.