Namminersorlutik Oqartussat inissiaateqarfiini arfineq-marlunni ineqarnermut akinik qaffaaniarnerat akerleraat. Iluarsartuussinissamut aqutsisoqarfimmut aningaasartuutissaagaluit inissiat iluarsartuunneqarnissaannut atorneqaannarnissaat partiip kissaatigigaa, Siumumit Jess Svane oqarpoq.Assi: Jess Svane/KNR

Siumup inissiat akiisa qaffannissaat pinaveersaarniarlugu aqutsisoqarfik aningaasanik aallerfiginiaraa

Namminersorlutik Oqartussat najugaqarfiutimi immikkoortortaannut iluarsartuussinissamik aqutsisoqarfimmik pilersitsiniarnerat partiip atorunnaarseqquaa.

Naalakkersuisut aqutsisoqarfimmik, iluarsartuussinissamut, aserfallatsaaliuinissamut ingutserinissamullu tunngatillugu Namminersorlutik Oqartussanut sanaartornermik suliaqartuutitsisussamik pilersitsiniarnerat pisariaqanngitsoq Siumut isumaqarpoq.

- Tassa ataqatigiitsissinnaanngisarput uagut, sooruna INI-mi attartortut akilerniaraat allasarnissaa, Inatsisartunut Siumumit ilaasortaq, Jess Svane oqarpoq.

Taassuma aappaagumut aningaasanut inatsisissatut siunnersuut iluarsartuussinissamik aqutsisoqarfimmik maluginiagaqarfigisani innersuussutigaa.

Jess Svanep aqutsisoqarfimmi arfinilinnik sulisoqarneq Namminersorlutik Oqartussat inissiaataannik iluarsartuussinissamut marloqiusamik allaffissornertaqalissasoraa. Politikerip oqarnera naapertorlugu allaffissorneq Namminersorlutik Oqartussat inissiiatileqatigiiffiusaanni INI A/S-imeereerpoq.

- INI A/S tassannga ingerlatsereerpoq. Taava sooq INI A/S-ip saniatigut aamma allaffissornikkut 5,3 millionit koruunilimmik pilersitsissagatta. 5,3 millionit koruunit tunniukkutsigit pitsaanerunngila, Jess Svane oqarpoq.

Taamaammat illuatungiliuttut partiiata Naalakkersuisut eqqarsaatiginneqqeqqullugit inissiaatimi arfineq-marluk iluarsartuunneqarnissaannut amigartooruteqarnerannut aningaasanik atuiinnarnissaannik kaammattuuteqarfigai.

Sulisunik nuutsitsisoqassasoq

5,3 millionit koruunilli Iluarsartuussinissamut Aqutsisoqarfimmut atorniarneqartutut Jess Svanep eqqartugai Namminersorlutik Oqartussat missinngersuutaanni aningaasat nutaajunngillat.

Tamanna ineqarnermut naalakkersuisoqarfiup KNR-imut paasissutissiissutigaa. Iluarsartuussinissamut Aqutsisoqarfik Namminersorlutik Oqartussat iluani nikititerisoqarnerata inernerissavaa. Assersuutigalugu ”Sanaartornermik ingerlatsinermik aserfallatsaaliuinermiillu” sulisut marluk aamma Ineriartortitsinermut, nakkutiginninnermut attaveqaqatiginnermullu susassaqarfimmit sulisoq aqutsisoqarfimmut nutaamut nuutsinneqassapput. Taakku Namminersorlutik Oqartussat iluarsartuussinermut aqutsisoqarfianit sulisunik marlunnik ilalerneqassapput. Allaffissorneq taanna INI A/S-imit ingerlanneqaraluarpoq.

Tassa imaapoq suliassat sulisullu INI A/S-imiissimasut Iluarsartuussinissamik Aqutsisoqarfimmut nuutsinneqassasut.

Ilaatigut ineqarnermut naalakkersuisup, Naaja H. Nathanieslenip oqarnera naapertorlugu Iluarsartuussinissamut aqutsisoqarfik Namminersorlutik Oqartussat sanatitsisutut ilisimasaqarnerulernissaq pillugu pilersinneqarpoq.

- Suliniutip pissutsit pitsaanerulersillugillu akililinnerulersissavai tamatuma saniatigut allaffissornikkut annertusiisoqassanani, Naaja H. Nathanielsen allakkatigut akissuteqarpoq.

Missingersuutini naligiittoqarnissaanik piumasaqaat

Namminersorlutik Oqartussat inissiaataat 2877-it januaarip aallaqqaataanit akitsussapput. Tamanna Namminersorlutik Oqartussat inissiaateqarfiini arfineq-marlunni ingerlatsinermut missingersuutini 4,9 millionit koruuninik matussusiissaaq.

AAMMA ATUARUK Inissiamik attartortoq pakatsisoq: Inissiat akisunerulernissaat akuerineqarsinnaanngilaq

Inissiaqarfiimmi isertitaasa aningaasartuutaasalu akornanni naligiittoqarnissaa inatsimmi piumasaqaataavoq. Tamanna ineqarnermut naalakkersuisup, Naaja H. Nathanielsenip inissiat akitsornissaanik nalunaaruteqarnermini oqaatigaa.

Inissiat januaarip aallaqqaataanit akitsornissaat

 

Naalakkersuisut inissianut 2.877-inut januaarip aallaqqaataanit akitsuiniarlutik nalunaaruteqarnikuupput.

 

Namminersorlutik Oqartussat inissiiaateqarfiini arfineq-marlunni attartortut tassani ilaapput.

 

Inissianut akitsuinissaq inissiaqarfinni arfineq-marlunni 4,9 millionit koruuninik amigartooruteqarnermik naligiissitsiniarnermik pissuteqarpoq.

 

Aningaasat inissiaqarfinni pinasuartumik iluarsartuussinissamut atorneqassapput.

 

Naalakkersuisut inissiaqarfinni akitsuinissat inissiaqarfiit ingerlatsinermut missingersuutaani naligiittoqarnissaa inatsimmi piumasaqaataaneranik tunngavilerpaat.

 

Ineqarnermut akiliutit pillugit attartortitsinermut peqqussut naapertorlugu ineqarnermut akiliutinik iluarsiisarnermut aqutsinermullu tunngasut tunngavigineqarput, tassungalu ilaatinneqarput inissiaqarfiup ataatsip inissiataani ineqarnermut akiliutinit isertitat tamakkiisut sukkulluunniit aalajangersarneqarnerini najugaqarfiup aningaasartuutissaasa tamarmiusut akilerneqarsinnaanissaat.

Paasissutissarsiffik: Naalakkersuisut

Tassunga atatillugu 4,9 millionit koruunit inissiaqarfinni taakkunani pinasuartumik iluarsartuussinissamut atorneqassasut aamma nassuiaatigaa.

Inissiat aserfallassimasut ajornartorsiutaangaatsiartut

Namminersorlutik Oqartussat inissiiaataanni aserfallatsaaliuiniarnerup ajornartorsiutaanera nutaajunngilaq.

Inissiat iluarsartuunnissannut 1,5 milliardit koruunit 2016-imi amigaatigineqarput. Namminersorlutik Oqartussat najugaqarfiini aserfallatsaaliuinermi naatsorsuutit amigaataasut 1,7 milliardit koruunit 1,9 milliardit koruunillu akornanniinnissaa missiliorneqarpoq.

Siumut 2016-imit ukioq manna apriilimut naalakkersuisuni siuttuupput.

Siumut Namminersorlutik Oqartussat inissiaataanni aserfallatsaaliuinissamik amigaateqarnermut aaqqiissuteqarniarluni qanoq iliorpa?

- Atuisup inimik attartornini aammalu procentimik aalajangersimasumik aserfallatsaaliinermut akilereertarpaa. Taamaammat uagut qaffatsaaliuisimavugut, Jess Svane oqarpoq.

Taassuma aserfallatsaaliuiniarneq ukiut ingerlaneranni qanoq pisimanersoq apeqquserpaa.

- Aamma isiginnginnatsigut inissiarparujussuit ukiunik 40-nik 50-inik pisoqaassusillik nutarterneqarpiassanatillu akitsoriartuinnarnerat.

Taassuma inissiamut akit qaffannissaat naleqqutinngissoraa.

Inissiat katillugit 2.877-iusut januaarip aallaqqaataanit akitsussapput. Najugaqarfiit 2022-mi januaarip aallaqqaataanit akitsuiffiusussat uani takusinnaavatit:

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat