Assi: KNR / Malik Brøns

Siumup immikkoortortaqarfii eqqissiviilliornermut: Sorlaqarfik ilumini qalaattuuleraangat toqqissisimanartanngilaq

Siumumi eqqissiviilliorneq pillugu partiip ulluinnarni aqutsisuinit KNR-imit oqaaseqartitsiniarsarineqarput suli iluatsinngilaq.

Henrik Fleischer aalisarnermut ataatsimiititaliami siulittaasoq Siumumit sapaatip akunnerata naanerani anisitaasimasoq Sermitsiaq.AG allappoq. Allaaserisamili tusarfik suminngaanneernersoq eqqaaneqanngilaq.

Henrik Fleischer partiiminit ilaasortaajunnaartitaasimernerluni suli naluaa. Partiip siulersuisuunerini paatsoortoqarsimassasoq taanna KNR-imut ippassaq oqarpoq.

Siumumilu pisoq pillugu oqaaseqarumasoqanngivippoq -  partiimi siulittaasup tullia Karl Kristian Kruse oqarasuaatikkut ullut kingulliit marluk attaveqarfiginiartaraluarnera iluatsittanngilaq.

Suliaq naatsumik

- Inatsisartut aalisarnermut ataatsimiititaliaata aalisarnermut naalakkersuisoq Jens Immanuelsen (S) tatigiunnaarlugu Henrik Fleischer siuttoralugu tusagassiuutinut pingasunngornermi februaarip 19-iani nalunaarutigaat.

- Taamatut pisoqareernerata kingorna Henrik Fleischer Siumumi ilaasortat ilaannit siulittaasuulluannginnerarlugu isornartorsiorneqarpoq.

- Pisoq paatsooqatigiinnerusoq henrik Fleischerip KNR-imut oqaatigaa. Partiimiillu anisitaasimanerluni ilaasortaaginnarnerluniluunniit naluaa.

- Siumup siulittaasuata Kim Kielsenip ulluinnarnilu aqutsisuni ilaasortap Vivian Motzfeldtip Karl Kristian Kruse oqaaseqartussaanerarpaat.

Partiimi eqqissiviilliorneq pillugu sinerissami immikkoortortaqarfimminut paasissutissiisannginnera Upernavimmi Ittoqqortoormiinilu immikkoortortaqarfinni siulittaasut isornartorsiorpaat.

- Kattuffiup taama iliornera immikkoortortaqarfimmiit uagut akuersaarsinnaanngilarput, Upernavimmi immikkoortortaqarfimmi siulittaasoq Hans Grim taama oqarpoq.

Siumumi siulersuisuunerit tusagassiuutinut paasissutissiissallutik pisussaaffigigaluaraat taanna isumaqarpoq.

- Siumup oqaaseqartartua pisussaavoq inuiaqatigiinnut ilisimatitsissalluni. Imaagani matoqqasumik sulissalluni siammasissumiguna sulisoqartariaqartoq,

Henrik Fleischerimut Mikael Petersenimullu tunngasunik paasitinneqarsimannginnami oqaaseqarfigisinnaannginnerpai.

- Siumup Kalaallit Nunaannut sullissiniarnera kipiluttunarpallaaleqaaq.

Qalaattutut ileraangata

Partiilu eqqissiviilliorfiutillugu Siumup immikkoortortaqarfimminut malinnaatitsisannginnera partiip Ittoqqortoormiini immikkoortortaqarfianit sakkortuumik aamma isornartorsiorneqarpoq.

- Uagut maani avinngarusimasuumiikkatta ulluinnarni malinnaaniarnerput ajornakusoorpoq. Aatsaallu partiimi sakkortuuliortoqaleraangat tusagassiuutitigut malussartarpugut, Andreas Sanimuinnaq oqarpoq.

AAMMA ATUARUK Nivi Olsen: Demokraatit suna tamaat akigalugu Siumut tapersersornavianngilaa

Siumummi sinerissami ilaasortarpassuaqarmat partiip siuttui ammanerusariaqartut taassuma kaammattorpai.

- Toqqissisimanartanngeqaat ilaasortaaffigisaq sorlaqarfik taamatut ilumini qalaattutut ileraangat. Assut naalaarulunnartarpoq.

Siumup Upernavimmi Ittoqqortoormiinilu immikkoortortaqarfiisa Kim Kielsen partiimi siulittaasutut tunuarnissaa siusinnerusukkut kissaatiginikuuaat.

Partiip immikkoortortaqarfiinik allanik attaveqarfigigaluarpagut, oqaaseqarusuttoqanngilarli.

Karl Kristian Krusep KNR-imit oqaaseqartinniarsarineqarnini SMS-ikkut akissuteqarfigaa, "periarfissanngorpat attaveqassalluni" neriorsuutigaa, oqaatiginaguli qaquguussanersoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat