Siumup gruppia malittarisassaqalissaaq

decembarip 02-at 2004 09:59

Siumup inatsisartuni ilaasortaasa gruppianni suleriaaseq malittarisassiuunneqartussanngorpoq.

Simon Olsenip aningaasaqarnermut ataatsimititaliami siulittaasussatut qinersinerup aalassatsitsinera tunngavigalugu partiip ulluinnarni aqutsisui ippassaq ataatsimiillutik aalajangerput Siumut-gruppimi suleriaaseq malittarisassaliuunneqassasoq. Siumup siulittaasua Hans Enoksen ilisimatitsivoq malittarisassat nutaat inatsisartut upernaaru ataatsimiinnissaat sioqqullugu naammassiniarneqassasut.

Malittarisassani aalajangersorneqassapput inatsisartuni ilaasortat sunik pisinnaatitaaffeqarnersut partiimullu ileqqorissaarneq qanoq paasisariaqarnersoq. Taamatuttaaq gruppimi taasinerit qanoq ingerlanneqartassanersut aalajangersorneqassaaq.

Siumup ulluinnarni aqutsisuisa ippassaq ataatsimiinneranni inatsisartuni ilaasortaq Ruth Heilmann, aqutsisuni aamma ilaasortaasoq, sakkortuumik uparuarneqarpoq. Radioaviisip paasisai naapertorlugit Ruth Heilmann naveerneqarpoq gruppip atatsimiinneranni matoqqasumi pisimasut pillugit tamanut ammasumik oqaluttuarnini pissutigalugu. Ruth Heilmannip taamani Simon Olsenilu aningaasaqarnermut ataatsimiititaliami siulittaasunngorniunnertik tusagassiuutinut oqaluttuaraa. Partiip aqutsisuisa tungaanniit tamanna tatigeqatigiinnermik ataqqeqatigiinnermillu innaliinertut isigineqarpoq.