Siumup Folketingimut sassartitassani sisamat nalunaarutigigai

Folketingimut qinigassanngortitassat sisamat Siumup siulersuisuunerisa marsip sisamaani ataatsimiinneranni akuersissutigineqarput. 

Tassaapput Inatsisartunut ilaasortaasimasoq, Ineqi Kielsen, 25-nik ukiulik, Inatsisartuni Naalakkersuisunilu ilaasortaasimasoq Jens-Erik Kirkegaard, 43-nik ukiulik, sexologi Ulrikka Holm, 33-nik ukiulik, kiisalu Aki Mathilda Høegh Dam, naalagaaffiit pissusiinik ilisimatusarnermi Københavnip Universitetiani bachelorinngoqqammersoq, 22-nik ukiulik.

Nunatsinni partiinit arfineq-marluusunit arfinillit taamaalillutik Folketingimut qinersinermi, ukioq manna kingusinnerpaamik juunip 17-iani pisussami, sassartitassamik ilaat saqqummiuppaat.

Qinigassanngorteqqittut

Siumup qinigassanngortitaata sisamaasut saniatigut nunatsinnit Folketingimi maanna ilaasortaasut Aleqa Hammond Nunatta Qitornaaneersoq aamma Aaja Chemnitz Larsen Inuit Ataqatigiinneersoq qinigassanngorteqqillutik nalunaarutigereerpaat.

Inatsisartuni sinniisutut ilaasortaasoq Bentiaraq Ottosen Atassutip qinigassanngortippaa.

Suleqatigiissitsisuniillu Louis Sigurdsen, teologi Suleqatigiissitsisunilu allatsi qinigassanngortippoq.

Demokraatit Folketingimut sassartitassaminnik suli saqqummiussaqanngillat.