Siumup Folketingimut qinigassanngortitai saqqummiunneqarput
Partii Siumup folketingimut qinersineqalerpat qinigassatut siunniussami aqqi ullumi saqqummiuppai, angutit marluk arnallu marluk tamarmik annerusumik minnerusumillu nunarput tamakkerlugu ilisimaneqartut taakkunannga ataaseq maanna folketingimut ilaasortaalluni.
Oqaatigineqartutut Lars-Emil Johansen parteeqatiminit assigiinngitsunit pingasunit unammillerneqartussanngorpoq, kisianni pinngitsoorani suli oqaatigineqarsinnaalluni unammillertiminit politikikkut misilitagarnerpaajulluni sassaqqittussanngortoq folketingimut maanna ilaasortaanermi saniatigut siornatigulli folketingimut ilaasortaasareerami, inatsisartunullu ilaasortatut qinigaajuarnermi nalaani naalakkersuisunut siullittaasooreerami. Lars-Emil Johansen ullumikkut 58-inik ukioqarpoq.
Unammillertaanit inuusunnerpaaq taannalu tunngavigalugu oqarluarsinnaagunarpugut sassaqatiminit misilittagakinnerpaaq tassa Doris Jakobsen, maanna inatsisartunut ilaasortaasoq, qinigaanini sioqqullugu Siumup inuusuttaanut suleqatigiinnut siulittaasuusoq aamma Sorlammut siulittaasuusimasoq. Doris Jakobsen 26-nik ukioqarpoq.
Ole Aggu Markussen maanna naalakkersuisumut Jørgen Wæver Johansenimut allattaavoq, inatsisartunut kingullermik qinersineqarnerani sassaqataagaluarluni qinigaananili, kisianni tamanna sioqqullugu Siumup inuusuttaanut suleqatigiinnut siulittaasuusimavoq Namminersornerullutillu Oqartussat qarasaasiaqarfianni, taamanikkut Q-datami, pisortaanikuulluni. Markussen 42-nik ukioqarpoq.
Kiisalu ilisimaneqarluartoq ukiumigullu Lars-Emil Johansenimut qaninnerpaaq tassa Marianne Jensen, 55-nik ukiulik qinigaaffinni assigiinngitsuni marlunni 90-ikkunni naalisarlugit kulturimut peqqinnissaqarfimmullu naalakkersuisuusartoq, nunarsuarmiut Genevemi suleqatigiiffianni immikkoortumi pisortaasimasoq maannalu Namminersornerullutik Oqartussat pinngortitamut avatangiisinullu piosrtaqarfianni pisortaq.
Taamalu tusaasinnaavarsi Siumup utoqqasaat marluk, arnaq angullu, inuusukaallu marluk, aamma arnaq angullu, folketingimut piukkukkaat kinguaariitsigut nikinnissaq siunnersuutigisutut innerlugu.
