Siumup folketingimut qinigassanngortinniagai piareerput
Folketingimut qinersinissamut Siumut sinnerlugu qinigassanngortittut, partiimi siulittaasoq Aleqa Hammond ippassaq ataatsimeeqatigaat. Kikkut qinigassanngortinnersut ataasinngorpat pisortatigoortumik nalunaarutigineqassapput.
Siumut sinnerlugu folketingimut qinigassanngortittuni maannamut ilisimaneqalereersoq tassaavoq, Siumup Inatsisartuni ilaasortaatitaa, Doris Jakobsen. Qinigassanngortittut allat pingasut suli aqqi nalunaarutigineqanngillat, kisianni Siumumit oqaatigineqarpoq Doris Jakobsenip saniatigut arnaq ataaseq angutillu marluk qinigassanngortittut.
Qinigassanngortittut kikkuuneri ataasinngorpat nalunaarutigineqareerunik, taakku Danmarkiliassapput, Socialdemokraatit Folketingimi ilaasortaatitaat ulluni pingasuni ataatsimeeqatigissallugit. Partiit taakku marluk Folketingimi suleqatigiipput.
