Siumup ernumanera Naalakkersuisup pissutissaqarsorinngilaa

Naalakkersuisut takorloorpaat, inuit akitsuutitaqanngitsunik pisisarunnaarlutik pisiniarfinni tamakkiisumik pisisalernissaat, taama Siumut siulittaasuat Aleqa Hammond oqarpoq.

Imigassanik tupanillu akitsuutitaqanngitsunik nunatsinnut januaarip aallaqqaataaniit eqqussisoqarsinnaajunnaartoqassaaq.

Cigaritsit 200-t siornatigut eqqunneqarsinnaasimagaluartut, cigaritsit 40-it maanna eqqunneqarsinnaanngussapput. Eqqunneqarsinnaassappulli suli, mamakujuit tipigissaatillu.

Tamanna pillugu Aleqa Hammond ima oqarpoq.

- Angalaneq akisoreeqaaq, innuttaasullu angalanerminni akitsuuteqanngitsunik pisilaarsinnaasarnertik nuannaarutigisaraluaraat unitsinneqalerpoq.

Aningaasaqarnermut Naalakkersuisoq Palle Christiansen, Aleqa Hammondip oqaaserisaanut ima akivoq.

-Ukiumoortumik inatsisissaq 2011-moortoq suliarineqalermat, partiit tamaasa peqquagut aningaasanik aallerfigisinnaasatsinnik ujarleqqullugit. Illuatungiliuttut siunnersuuteqanngillat, taamaammat uagut naalakkersuisuutitaqartugut aningaasanik sipaarfigisinnaasatsinnik ujarlerpugut. Aningaasanik isertitsissutigisinnaasutut isigisimavarput, akitsuutitaqanngitsunik nunatsinnut eqqussisarneq unitsissallugu.

Aningaasaqarnermut Naalakkersuisumit oqaatigineqarportaaq, cigaritsinik eqqusseqqusiunnaarnissaq aningaasatigut nunatsinnut iluaqutaaginnassasoq.

-Inuit angalernerminni kartoninik cigaritsisartut, taakkuupput qanorluuniit kartoninik cigaritsisinngikkaluarlutik pisiniarfinni cigaritsisisussat. Taamaammat naatsorsuutigaarput, nunatsinni cigaritsinik pisinerminni akileraarutitaqanngitsunik tuniniaasarnertituulli isertitaqassalluta, Palle Christiansen oqarpoq.

Aleqa Hammondip annilaanngatigaa, akitsuutitaqanngitsunik imigassanik cigaritsinillu nunatsinnut eqqusseqqusiunnaarnerup malitsigissagaa, anngiortumik nunatsinnut eqqussisalerneq.

Ilanngaaserisut suliassaqarnerulertussaapput, ilanngaaserisullu amerliniarneqaratik.

- Taamaammat puullaaqisoqarnissaa aningaasatigullu amigartoorutaaginnalernissaa ilimagineqarsinnaavoq, Aleqa Hammond oqarpoq.

- Ilimagilluinnarparput inuit anngiortumik imigassanik tupanillu nunatsinnut eqqusseriartarnissaat, taamaakkaluartoq ilanngaaseeriaatissap tungaatigut oqaaseqarusunngilanga, Palle Christiansen oqarpoq.

Sooq oqaaseqarusunngilatit?

- Oqaatigigaluarutsigu qanoq pilersaaruteqarnerluta, annilaangagaarput inuit qanoq nunatsinnut eqqusseriarsinnaanissaminnik paasisaqarsinnaanerat. Oqaatigiinassavarali qanoq iliuuseqarnissatsinnik pilersaaruteqarluta, Palle Christiansen naggasiivoq.