Siumup eqeersimaarnissaq ujartorpaa

Aningaasanut inatsisissatut siunnersuutit kingulliit oqallisigineqaleraangata, inatsisartunut ilaasortat partiini Naalakkersuisuutitaqartuneersut, eqeersimaarneq ajorput. Siumut taama isumaqarpoq, taamaammat aningaasanut inatsisissatut siunnersuut suli piareertinnagu, politikerinut appisaluussipput. Isornartorsiuulli IA-p akerlilerpaa.
Allattoq Jens Thorin
juulip 28-at 2011 17:02

Inuiaqatigiit aningaasaataasa qanoq agguataarneqarnissaat Naalakkersuisut kisermaallugu naalakkiutigissanngippassuk, Inatsisartunut ilaasortat, IA-meersut, Demokratineersut Kattusseqatigiit Partiianneersorlu sukataarnerunissaat, Siumup siulittaasuata ujartorpaa.
- Aningaasanut inatsisissaq Inatsisartut ataatsimiittarfianni oqallisigineqaleraangat, Inatsisartut apeqqutissakitsuararsuusut takusarparput, maannamullu illua tungiliuttut kisiartaallutik inuiaqatigiit ineriartornerannut tunngasunik toqqaannartumik apeqquteqartarsimapput. Partiini naalakkersuisuutitaqartuniit eqeersimaarneq amingaatigisimaqaarput, Aleqa Hammond oqarpoq. 


Kisianni aningaasanut inatsisip qanoq isikkoqarnissaat Naalakkersuisut naalakkiutigineq ajorpaat. Inatsisissammi Inatsisartut ataatsimiittarfiannut apuutsinnagu, qanoq isikkoqarnissaa sukumiisumik oqallisiuartarpavut, IA-miit oqarput.

- Soorunami saqqummiunneqartut Inuit Ataqatigiinnut angerlaattarpavut,  inuiaqatigiinnullu qanoq kinguneqarnissaat tassani oqallissutigalugit, IA-p politikikkut oqaaseqartartua Aqqaluaq B. Egede oqarpoq.

Taassuma ilumoornerarpaa, Siumut qinersinerup kingorna aningaasanut inatsisissat pillugit oqallinnerni isornartorsiuisunik apeqquterpasuaqarsimammat. Kisianni IA isumaqarpoq, eqeersimaarneq uuttussagaanni qasseriarluni apeqquteqarneq apeqqutaanngitsoq.

- Inuiaqatigiit sullinneqarneranni apeqqutaanngilaq, kina qasseriarluni apeqquteqarsimanersoq kinalu qanoq suleriaaseqarnersoq. Uanili pingaartorujussuuvoq, aalajangigassat inuiaqatigiinnut pitsaanerpaamik sunniuteqarnissaannik aalajangersaanerit aqqutissiuutissallugit,Aqqaluaq B. Egede oqarpoq.

Aningaasanut inatsisiliornerni marlunni kingullerni Siumut peqataarneq ajorsimalluni, qanittukkut nalunaarpoq, aappaagu aningaasanut inatsisissap sunniuteqarfiginissaa ilungersorlutik anguniarniarlugu.