Siumup ataatsimeersuarnissaa piumasaraat

-Siumut ataatsimoorfiusoq maannakkut siuttuusut sequmilluinnalerpaat, taamaattumik immikkut ittumik ataatsimeersuarnissamik immikkoortortaqarfiit ilungersuuteqartariaqarput.

Taama oqarpoq Siumup Nuummi immikkoortortaqarfiani siulittaasup tullia Ole Berthelsen.

Taassuma oqarnera naapertorlugu februaarimi Siumup nuna tamakkerlugu ataatsimeersuarnera atorsinnaanngilaq, immikkoortortaqarfiit marluinnaat malittarisassat malillugit akiliisimammata.

-Ataatsimeersuarnermi taaseqataasinnaalluni peqataassagaanni akiliisimasariaqarpoq, kisianni taamaattoqanngilaq, Ole Berthelsen oqarpoq.

Taassuma oqarnera naapertorlugu taamanikkut siulersuisuunernit aaqqinneqarpoq ataatsimeersuarnermi peqataasut tamarmik taaseqataasinnaasutut najuunnissaat, naak tamanna malittarisassanik unioqqutitsinerugaluartoq.

-Ujartorpara immikkoortortaqarfiit immikkut ittumik ataatsimeersuartoqarnissaanik piumasaqarnissaat, isumaga malillugu ataatsimeersuarneq februaarimi pisoq atorsinnaanngimmat, Ole Berthelsen oqarpoq.