Siumup arnartai: Arnat politikerit amerlanerusariaqarput

- Siumumi siulersuisuunerni pingaartipparput Siumumi arnat piukkunnartorpassuit sukasartuarnissaat, aamma qinersinernut piukkunnartorpassuit peqataanerunissaat anguniarlutigu. Isumasioqatigiinnermi qulequtarineqarpoq arnat politikkikkut inissisimanerisa nukittorsarnissaat, amerlanerusullu peqataalernissaat, Doris Jakobsen oqarpoq, nangillunilu:

- Oqariartuutigisarput tassaavoq arnat Nunatsinni siuttuunissaminnut piareersimasut, tassa arnat aamma angutit soqutigisaannik tigusilluarsinnaasutut isigaavut, taamaammat piumasaqaatigivarput, soorlu inatsisartunut qinersinermi arnat angutillu tamarmik naligiimmik sassartitassatut saqqummiunneqartarnissaat. Aamma kaammattuutigaarput nunaqarfinni arnat amerlasuut peqataatinneqartassasut. Pingaaruteqarluinnarpoq arnat taamatut peqataanerutissagutsigik, taava inatsisartut suleriaasiat nutartertariaqarparput, ilaqutalinnut aamma tulluarsarlugu. Massakkut ataatsimeeriaaseq piffissami sivikitsuararsuarmi ingerlanneqartarpoq, ullaamiit unnussuarmut ilanni ingerlasarluni, taamaammat tupiginngilarput arnarpassuit ilaanni politikkimut isernissartik tunuarsimaarfigisarmassuk. Taamaammat taassuma piaartumik iliuuseqarfiginissaa aamma pingaartipparput.

Siulersuisuunerit arnanut pingaartitani sunniuteqarluartumik sulissasut anguniakkatsinnut ilaavoq, soorunami aamma arnat qiimmassarlugillu nersualaarneqartuarnissaat pingaaruteqarpoq – soorlu arnanut siuarsaanissamut anguniagassarpassuit saqqummiussuunneqarput, soorlu meerartallit aamma qanoq politikkikkut peqataanerusinnaanerat aamma aqqutissiuukkusupparput, arnallu pikkorissut atorluarnissaat siunniullutigu. Tassa politikkikkut anguniagassarpassuit saqqummiussuunneqarput, arnanut tunngasuinnaanngitsut, kisianni aamma teknikkimut, avatangiisinut aamma aningaasaqarnermut tunngassuteqartut saqqummiunneqarlutik.