Siumup arnanit aqunneqarnerunissaa qinigassanngortittup ujartorpaa

Partiip Siumup arnanit amerlanerusunit aqunneqarnissaa inatsisartunut qinigassanngortittup Elisabeth Ravn Johansenip kissaatigaa. Qinigassanngortitat amerlassusaat eqqarsaatigigaanni, siuttuunneq Siumut Inuit Ataqatigiillu avippaat. Partiit taakkua marluk tamarmik immikkut 62-inik qinigassanngortitsipput.
Allattoq Mads Lynge
maajip 17-at 2009 11:55

Kisianni arnat angutillu naligiinnissaat isiginiaraanni, partiit pineqartut assigiikkunnaarput. Inuit Ataqatigiimmi qinigassanngortitaasa affaat arnaapput, Siumup arnat 15-iniinnaat sassartikkai.

- Inuiaqatigiinni naleqartitat oqimaaqatigiissaarneqassappata angutit arnallu suleqatigiissapput. Kina oqarami arnamik Aalisarnermut, Piniarnermut Nunalerinermullu Naalakkersuisoqarsinnaanngitsugut? Elisabeth Ravn Johansen aperivoq.

Arnat Siumumeersut politikkimi peqataanerunissaat anguniarlugu Siumukkut arnartaasa Arnat Café apriilimi pilersikkaat Elisabeth Ravn Johansenip eqqaasitsissutigaa, politikkikkut pisut Arnat Cafémi eqqartorneqartarput, kikkulluunniillu peqataasinnaallutik, aamma angutit, Elisabeth Ravn Johansen allappoq.

Naalakkersuisut siunniussaat anguniassallugit naalakkersuisut siulittaasuannut Hans Enoksenimut naleqqiullugu pitsaaneruffigisinnaallugit, siornatigut naalakkersuisuusimasup Aleqa Hammondip oqaasii, tusagassiuutini sammineqangaatsiarput.