Siumup allatsigisimasaa akiliisussanngortitaavoq
Johannes Mathiassen partiip allattaatut sulinerminiit aningaasanik pissaqartinneqarluni isumaqaraluarpoq, illuanillu Siumut isumaqarluni Johannes Mathiassen akisussaatillugu partiip aningaasaataanik equngasoqalersimasoq.
Aningaasat 38.000-it tassaappat illuatungeriit imminnut piumasaqaataasa assigiinngissutaat.Tassalu eqqartuussiviup akueraa, Johannes Mathiassen katillugit 88.000 koruuninik Siumumit pissaqartinneqartoq, illuanilli aamma Siumut katillugit 126.000 koruuninik Johannes Mathiassenimit pisaqartinneqartoq aalajangiilluni.
Johannes Mathiassenip 2004-imi akissarsiamini tapeqartinneqarnissaminik piumasaqaataa eqqartuussiviup itigartippaa, soorluttaq 2005-imi 52.000 koruuninik qaangiuttoorsinissamik piumasaqaatai itigartikkaa.
Johannes Mathiassen Siumut qineqqusaarneranut atatillugu aallakaatitassianik suliaqarnermini 22.000 koruuninik ajunngitsorsinissamik piumasaqaatai eqqartuussiviup aamma itigartippai.
Eqqartuussivik aamma aalajangerpoq, Johannes Mathiassen akisussaasuusoq Partiip aningaasivianiittut 52.000 koruunit tammarsimammata.
Johannes Mathiassen-ip eqqartuussissuserisuata, Lissi Olesen-ip eqqartuussinerup inernera paasiuminaatsippaa.
Taanna isumaqarpoq, pappialat suliami ilanngutat ilisimannittullu nassuiaaneri imminnut assortuuttut Eqqartuussiviup aalajangernermini tunngavigigai. Taamaammat maannakkorpiaq oqarsinnaanngilaq, Johannes Mathiassenip suliaq Nunatta eqqartuussivianut ingerlateqqissaneraa.
