Siumumut illua´tungiliuttut naammagittaalliuteqarput

apriilip 08-at 2005 16:59

Sisimiuni kommunalbestyrelsemut qinersinerup inernera pillugu naammagittaalliuut partiit Siumumut illua´tungiliuttut pisortatigoortumik ullumi tunniuppaat.

Naammagittaalliuut Inuit Ataqatigiinnit, Demokraatinit Atassummillu atsiorneqarsimasoq Sisimiuni qinersinermik siulersuisunut borgmesterimullu Hermann Berthelsenimut nassiunneqarpoq.

Siumumeersup Malik Berthelsenip qinigassanngortinnissamut piumasaqaatit naammassisimanngikkaluarai qinigassanngortinneqarsimanera naammagittaalliuutigineqarpoq. Naammagittaalliortut isumaqarput, Malik Berthelsenip taasisai 215-it atorunnaarsinneqassasut.

Malik Berthelsenip taasisai partiimut tunuliaqutaanut tunniunneqassasut aalajangiunneqarsimavoq, kommunalbestyrelsemi Siumup amerlanerussuteqalerneranut kinguneqartitsisut.

Naammagittaalliuut qinersinermi siulersuisunit taamaalilluni suliarineqartussanngorpoq.