Siumumit tunuarpoq

Kangaatsiap kommunea suli borgmesterertaanngilaq. Partii Siumut kommunalbestyrelsemi amerlanerussuteqarnini annaavaa, qinigaasut ilaat ataaseq Siumukkut gruppianit tunuarpoq. Kangaatsiap kommunalbestyrelsiani inissat arfineq-marluupput.

Qinersinermi Siumukkut kommunalbestyrelsimi amerlanerussuteqalerlutik sisamanik ilaasortaatitaqaleraluarput, Atassumiit marluk ginigaallutik, Inuit Ataqatigiinniillu ataaseq qinigaalluni.

Maannamut borgmesteriusimasup Otto Jeremiassenip, Siumut, borgmesteriuinnarnissani taamaasilluni qulakkeeraluarpaa, Siumukkormiunili qinigaasut ilaat ataaseq Godmand Petersenip tunuarnerata kingunerisaanik Siumukkut imaaliallaannaq borgmeserinngortitsisinnaanngillat.

Radioaviisip paasisai naapertorlugit Godmand Petersenip Atassut Inuit Ataqatigiillu massakkut isumaqatigiissuteqarniarfigai.

Inuttaali tamanna pillugu radioaviisimut nammineq oqaaseqarumanngilaq, uppernarsarpaali borgmesterissarsiornermi pingaaruteqarluinnartuulluni: - Tamanna pillugu maannakkorpiaq oqaaseqarsinnaanngilanga, kisianni, aap, matuersaataavunga, Godmand Petersen oqarpoq.

Otto Jeremiassenilli tamanna paasisinnaannginnerarpaa. Siumukkummi nuna tamakkerlugu februaarimi ataatsimeersuarmata, Godmand Petersen siulittaasussatut sassarpoq, taaneqarnanili.

Otto Jeremiassen oqarpoq suleqatigiilersinnaanissaq siunertaralugu Atassummut saaffiginnissuteqarsimalluni, Atassummiilli suli tusagaqarsimanani.

Otto Jeremiassen aamma oqarpoq Godmand Petersen borgmesterinngorniarluni Siumumiit tunuartoq. Atassutikkut Inuit Ataqatigiillu suleqatigilissagaluarunigit kommunalbestyrelsimi amerlanerussuteqalissapput.