Siumumi ulloq nuannaarfik

- Naalakkersuisuni ajornartorsiut, Palle Christiansen peersivissimanngilaa allamulli ajornartorsiut inissiinnarlugu.

Siumup siulittaasua, Aleqa Hammond politikkikkut nutaarsiassaq annertuup ullumi tusarliunneqarnerata kingorna taama naliliivoq.

Naalakkersuisunik nikerartitsineq torrallaariarnerusoq Aleqa Hammondip aamma oqaatigaa, tassami marlunngorpat Inatsisartuni oqaluuserineqartussaavoq ilassutitut aningaasaliissutit, taakkulu oqaluuserineqarneranni tatiginnginnermik taasisoqariaannaasoq Naalakkersuisut siulittaasuata naatsorsuutigisimassagaa, Aleqa Hammondip eqqoriarpaa:

- Ilassutitut aningaasaliissutit marlunngorpat Inatsisartuni oqaluuserineqartussaapput, tassanilu Aningaasaqarnermut Naalakkersuisoq oqaluttarfimmiittussaavoq. Palle Christiansen oqaluttarfimmiit oqaloreerpat, Naalakkersuisut siulittaasuata nalunngilaa Siumut tatiginninnginnermik taasisussaasut. Aammalu ilimattaappara Kuupik Kliestip tunuliaqutimininngaanniit tassalu Inuit ataqatigiinniit Palle Christiansen illersorneqarnavianngitsoq, taamaalillunilu ulorianartorsiortinneqarnissani ilimattaassimassallugu.

Aleqa Hammondip isaanik isigalugu, Kuupik Kleistip maanna iliuuserilersimavaa, ajornartorsiutimik piiaaneq:

- Naalakkersuisooqatigiit ippassaanitsiaannannguaq oqalupput qanoq nukittutigalutik. Ullumikkulli takutippaat tamaattoqanngitsoq. Oqartussaaffiiaaneq maanna erserpoq, soorlu Aningasaqarnermut Ataatsimiititaliaq taama pineqartoq. Oqartussaaffinnik nikerartitsineq ajornartorsiutinik nuutsinerinnaavoq.

Aleqa Hammond oqarpoq.

Taassuma ilanngullugu oqaatigaa, illuatungiliuttut illuatungiliulluartuunerisa kingunerisaanik Naalakkersuisooqatigiit taamatut inississimalersissimagaat:

- Assoroorluta sorsuutigisimavarput Air Icelandimut isumaqatigiissutip akuerineqannginnissaa, naak illuatungiuliuttuni kisimiikkaluarluta Naalakkersuisooqatigiit maanna inissisimanerat angusimavarput ajornartorsiulersissimallugillu, allaat isumaqatigiissummut akisussaasoq allamut oqartussaaffimmut nuutsinneqartariaqalersissimallugu.

Aleqa Hammond taama naggasiivoq, tassalu nuannanneq ingerlaqqissinnaalerluni.