Siumumi siulittaasutut sassartut pingatserput

Siumup siulittaasussaatut qinigassanngortittut pingatserput. Hans Enoksen Jørgen Wæver Johansenilu unammillerlugit ullumi sassartuuvoq Kangaatsiami Siumup immikoortortaqarfiani allatsi 46-nik ukiulik Godmand Petersen. Siulittaasunngussagaluaruni naalakkersuisuni siulittaasunngornianngilaq, suliassamilu pingaarnersaattut isigaa partiip ataatsimoornerulersinnissaa.

-Ilaasortaqarput saamerlerniit talerperlernut taakkuningalu naapititseriaasinnaasumik siulittaasoqartariaqarpoq, Godmand Petersen oqarpoq.

Siumumi ullumikkut aqutsineq allanngorluinnartariaqarsoraa.

-Immikkoortortaqarfinni isummat paasinngilluinnarlugit aalajangiisoqartarpoq, tamannalu allanngortariaqarpoq, qinigassangortittoq oqarpoq.

Hans Enoksenimut Jørgen Wæver Johansenimullu unammillersinnaalluarnerarpoq.

-Suliassat agguataarnerusariaqarput, ajorpormi taama suliassaqartigereersut siulittaasunngorniartarnerat. Partiip uummarissarniarneqarneranut ajoqutaaginnarput.

Kangaatsiami Siumup immikoortortaqarfiani siulittaasoq Jakob Ludvigsen oqarpoq Godmand Petersenip qinigassanngortinnerani immikkoortortaqarfik tunuliaqutaanngitsoq.

Siumut ataatsimeersuassaaq Sisimiuni februaarip 17-anniit 19-at ilanngullugu.