Siumumi siulittaasussatut qineqqusaarutit

Siumut partiia siulittaasussaminik aqagu qinersissaaq, siullermeerlunilu ilaasortat ataasiakkaat qinersisinneqassapput.
Allattoq Jokum Nielsen
januaarip 22-at 2008 09:30

Qinigassanngortittut qineqqusaarumminni kalaalinngorsaaneq pingaartippaat.

-Kalaallit sulisinnaasut ilinniarsimasut ukiorpassuarni isiginnaartuinnartut ingerlatissimavagut, ilaatigut aalajangernissat sakkortuumik qisuariarfiusartut pinngitsoorumallugit, ilaatigut Hans Enoksen qineqqusaarummini allappoq, erseqqissarlugulu kalaalinngorsaaneq Namminersornerullutik Oqartussat suliffeqarfiutaani tamani aamma pissasoq.

Akit assigiikkunnaarnerata nalimmassaqqinnissaa, angallannerup aningaasaliiffigineqarnerunissaa, ilagiinni sulisut atugarisamikkut aaqqiiffigineqarnissaat ineqarnikkullu tapiissutit qaffionnissaat aamma Hans Enoksen-ip qineqqusaarutigai.

Aleqa Hammond-ip qineqqusaarummini erseqqissarpaa kalaallinngorsaanneq tassaaginnanngitsoq oqaatsinik atuineq, aammalu tassaaginnanngitsoq departementchefinik atorfinitsitsineq. -Killormuanilli, pingaaruteqarpoq kalaallisut oqaatsitta piumasaqaatitigut aqqutissiuunneqarnera ajunngitsuuvoq aallaavigineqarsinnaasorlu siunissamili kalaalinngorsaanermik oqallittoqarnerani aamma kalaaliussutsip nassatarisaasa ilai soorlu piniarneq, aalisarneq, nerisaqarneq, ileqqoqarneq allarpassuillu ilanngullugit eqqartorneqartariaqarput allatulli aamma nalilersorneqarlutik, Aleqa Hammond allappoq.

Namminersulernermut atatillugu Aleqa Hammondip tamat oqartussaaqataanerat inuillu ataasiakkaat immineq akisussaaffeqarnerat qineqqusaarummini aamma allaaserai, soorlu aamma piujuartitsineq tunngavigalugu aalisarneq, inuussutissarsiutinik ineriartortitsineq nunanullu tamalaanut attaveqarneq qineqqusaarutigigaa.

Vittus Mikaelsen qineqqusaarnermini allapoq: -Nunasiaataasimanerup kingunerisaanik eqqarsartariaaseq, tassalu qallunaat naalagarsuartut isiginiartarnerat unitsittariaqarpoq.

Taamaattumik Siumumut siulittaasunngussaguni ilaatigut sulissutiginiarpaa Kalaallit Nunaanni suliffeqarfissuit kalaallinit ingerlanneqarnissaa, aatsitassarsiornermilu isertinneqartut tamakkiisumik Kalaallit Nunaannut isertinneqarnissaat.