Siumumi siulittaasumik qinersineq kinguartinneqartoq
Siumumi siulittaasumik qinersineq akunnernik marlungajannik kinguartinneqarpoq.
Siumumi siulittaasumik ullumi sapaammi partiip ataatsimeersuarnerani ullormi kingullermi qinersisoqartusaavoq.
Pilersaarutit malillugit nalunaaqutaq ataatsimiit qinersisoqartussaagaluarpoq. Qinersinissarli 14:45-mut kinguartinneqartoq, Siumup allattaanera paasissutissiivoq.
AAMMA ATUARUK Siumup ataatsimeersuarnerani arfininngorneq takisooq: Marlunnik atuuffeqarsinnaatitaaneq atulerseqqinniaraat
Siumumut ilaasortat sinerissamit tamaneersut 70-it missaat Nuummi ataatsimeersuaqataapput. Siumumullu kina ataatsimeersuarnissap tulliata tungaanut siulittaasuussanersoq, kikkullu partiip siulersuisuuneriniissanersut qinersissutigissavaat.
Maanna siulittaasuusup, Kim Kielsenip, unammillertai marluupput, tassaallutik Vivian Motzfeldt Erik Jensenilu.
Siulittaasumik qinersineq KNR-2-ikkut knr.gl-ikkullu 14:45-mit toqqaannartumik aallakaatissavarput.