Eqqartuussivimmi suliaq Aslak Jensenip ilaqutaanut tunngatillugu kommunip aalajangiuteqarsimaneranut tunngassuteqarpoq.Assi: Simon Uldum

Siumumi politikerip eqqartuussaanera: Pinerluuteqaqqissaguni ulluni 20-ni pineqaatissinneqarsimasunut inissiisarfimmiissasoq

Inatsisartuni Aalisarnermut, piniarnermut nunalerinermullu ataatsimiititaliami siulittaasup tullersortaa isumaginnermik suliaqartumut toqutsinissamik siorasaaruteqarsimasutut unnerluutigineqarluni eqqartuussivimmi ullaap tungaa sassartinneqarpoq.

Siumumit politikeri piffissami aggersumi pinerluuteqaqqissaguni ulluni 20-ni pineqaatissinneqarsimasunut inissiisarfimmiittussanngortinneqartussanngorpoq.

Eqqartuussiveqarfik Sermersuumi Nuummi eqqartuussineq taama inerneqarpoq.

Tassa imaappoq Aslak Jensen ukiuni tulliuttuni inatsisinik unioqqutitseqqissaguni ulluni 20-ni pinerluuteqarsimasunut inissiisarfimmiitsinneqassaaq.

Taanna Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianerluni isumaginninnermik suliaqartumut toqutsinissamik siorasaaruteqarsimasutut unnerluutigineqarpoq. Pinerluttuliornermut inatsimmi pisortani suliffeqartumut tunngasumik paragraf 37-mik unioqqutitsisimasutut unnerluutigineqarpoq.

Eqqartuussivimmi suliaq kommunip taassuma ilaqutaanut tunngatillugu aalajangiuteqarsimaneranik tunngassuteqarpoq.

AAMMA ATUARUK Siumut-politiker i retten: Nægter sig skyldig i dødstrusler

Aslak Jensen pinngitsuunerarpoq.

Suliami illersuisoq unnerluussisussaatitaasorlu eqqartuussummik suliassanngortitseqqissanerlutik eqqarsarfissaqarumapput.

Unnerluussisussaatitaasut pinerluuteqaqqissappat ulluni 30-ni pineqaatissinneqarsimasunut inissiisarfimmiittussanngortitsinneqarnissaa piumasaqaatigigaluarpaat.

Unnerluussut naapertorlugu taanna Kommuneqarfik Sermersuumi isumaginninnermik suliaqartumut oqarasuaatikkut ima oqarpoq: - Ilissi politeersuillu toqorassuassi.

- Kinaanerit ujartussuakkit. Utaqqilaarit toqussuakkit.

Tamannali Aslak Jensenip eqqartuussivimmi ullumi ilisarisinnaannginnerarpaa. Kommuneqarfik Sermersuup isumaginnittoqarfianut sianersimanini eqqaamanerarpaa, siorasaaruteqarsimanngissorivorli.

- Toqussavakkimmik oqarninnik eqqaamasaqanngilanga. Suliaq tamaat misissuiffiginiarlugu oqaatigaara, eqqartuussivimmi oqarpoq.

Aslak Jensen Inatsisartunut apriilimi qinersisoqarmat Siumumeersut qinigaanerpaat pingajoraat. Taanna Inatsisartuni Aalisarnermut, piniarnermut nunalerinermullu ataatsimiititaliami siulittaasup tulleraa.

Eqqartuussisup aalajangiinermini ilisimannittup nalunaajaataa eqqartuussivimmi saqqumminneqartoq pingaartippaa.

Ilisimannittutut aggersarneqarsimasoq tassaavoq inunnik isumaginnittoq 2017-imi oqarasuaatikkut Aslak Jensenip saaffiginninneranik tigusisoq.

Eqqartuussivimmi inunnik isumaginnittoq nassuiaavoq Aslak Jensen suliaq ilaquttaminut tunngasoq, kommunip aalajangiiffigisimasaa pillugu paasissutissanik piniarluni sianersimasoq.

Aslak Jensen suliamut akuunnginami paasissutissanikpisinnanngilaq. Taavalu ilisimannittoq naapertorlugu kamattorujussuanngorsimavoq, qunusaaraluni oqarasuaammullu suaartarluni. Oqarsimanerarpaalu inunnik isumaginnittoq, suleqatai politiillu toqunniarlugit.

Inunnik isumaginnittup kingornatigut oqaluttuaraa Aslak Jensenip nulia saaffigineqarsimasoq.

Oqarasuaammi nulia assut qiasimanerarneqarpoq oqarsimallunilu:

- Matorsi qanoq ittuua? Qoorortooqarpoq.

Ilimannittoq: Matu suna?

- Qoorortuuni tigusimavaa toqukkiartorlutillu anilluni.

Politiit ingerlaannartumik ilimasaarneqarput. Taakku kommune qinnuigaat matut taamaasa parnaaqqullugit igalaallu qimaqqullugit.

Ilisimannittoq naapertorlugu nalunaaquttap akunnerpassuini taamaappoq erseqqissaavorlu Aslak Jensenip qunusaarutaa erseqqilluinnartuusoq qularineqarsinnaanani.

Pisulli kingornatigut ullualunnguit qaangiummata inunnik isumaginnittoq allamik nassuiaasimaneraavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl