Siumumi nuimasut akornanni isumaqatigiittoqanngilaq

Naalakkersuisunngortitsinermi Siumup qinigaatitaasa akornanni kikkut qinigaanerpaaneri naapertorlugit Naalakkersuisunut ilaasortassat ivertinneqanngillat, tamannalu ilungersunarpoq ajuusaarnarlunilu, ukiorpassuarni Siumumi siulittaasuusimasoq aamma Naalakkersuisunut siulittaaasuusimasoq qinersinermilu Siumumi qinigaanerpaanut ilaasoq, Hans Enoksen taama isumaqarpoq.
apriilip 11-at 2013 11:54

- Naalakkersuisunngortitsiniarnermi isumaqatigiissutit atsiorneqannginnerani aamma atsiorneqarnerisa kingorna attavigineqarsimannginnerput uannut ilugersunarsimavoq, tassami sunik ilanngussaqarsinnaanersugut aperineqannginnatta, taamaattumik isumaqarpunga partiit siuttui kisermaassillutik ingerlatsisimapput, tamannalu ajuusaarnarpoq.

Hans Enoksen nunaqarfimminut Kullorsuarmut ingerlaartilluni Ilulissani utaqqisoq taama oqarpoq. Taanna Inatsisartunut qinersinermi 623-inik taaguunneqarluni Inatsisartunut ilaasortanngoqqippoq.

Hans Enoksen aamma oqarpoq, Siumumi ileqquugaluarmat qinersinermi taaguunneqarnerpaat naalakkersuisunngortitsiniarnermi aperineqartaraluartut, tamannalu AG-p ullaaq allaaserivaa.

- AG-p tamanna nalilerlusinnaassagaluarpaa, kisianni tassa ilumoortoq unaavoq, partiit siuttuinit minnerpaamilluunniit attavigineqarsimannginnatta aamma isumaqatigiinniarnerit ingerlaneranni Inatsisartuni ilaasortanngiortugut isumasiorneqarneq ajorpugut, tassalu tamanna akuerinikuunngisarput, Hans Enoksen taama oqarpoq imalu nangilluni oqarluni.

- Ukiorpassuarni partiimi peqataareerlunga naatsorsuutigisimagaluarpara arlaannut inissinneqarsinnaanera, kisianni tassa taamaattoqanngilaq, tamannali niaqorluutiginngilara allanngortissinnaanagulu, kisianni Siumup iluani aporaattoqarneranik oqalunneq pissuteqarpoq, Siumumi inatsisitta, innuttaaasunik maleqquneqartut Siumumi namminneerluta aamma malissagisut, tassali tamanna pisimanngilaq, Hans Enoksen taama oqarpoq.

Siumup partiitut malittarisassai Hans Enoksenip eqqaasai, Siumumi nuimanerit ilaasa Inatsisartunilu ilaasortap, Doris Jakobsenip ima nassuiarpai.

- Paragraf 16 stk 2-imi allassimavoq, Inatsisartunut qinersinerup kinguninngua partiimi qinigaasut siulittaasoqarfillu ataatsimiisinneqassasut, tassalu tanmanna pinngimmat ujartuivugut ilutsinnilu oqaluuseralutigu. Ujartuinitta kingorna siulittaasutta tamanna aaqqippaa, maannalu tassa ajornartorsiut qaangerneqareerpoq.

Doris Jakobsenip ajornartorsiut qaangerneqareersoq oqaatigigaluaraa, Hans Enoksen isumaqarpoq nalakkersuisunngortitsiniarnermi suleriaaseq allaanerusimasinnaagaluartoq imalu nangilluni.

- Isumaqatigiinniarnerup nalaani partiit siuttui kisermaassisorujussuullutik ingerlatsipput, tamanna miserratigineqarsinnaanngilaq! Hans Enoksen taama oqarpoq.

Inatsisartuni qinersinermi Doris Jakobsen 234-inik taaguunneqarluni ilaasortanngortoq oqarpoq nammineq Naalakkersuisoqatigiinnermi akisussaaffinnik annertuunik piumasaqarsimanani folktingimi ilaasortaanermini suliassat annertuut pingaartinnerugamigit.