Siumumi illua´tungiliuttut oqaasissaqarnerulerput

juunip 29-at 2005 10:44

Jonathan Motzfeldtip Siumumi siulittaasup tulliatut inissinnera partiimi illua´tungiliuttut oqaasissaqarnerulernerattut paasineqarsinnaasoq, oqaluttuarisaanermik ilinniagartooq nunatsinnilu politikkimik naliliisartoq Daniel Thorleifsen isumaqarpoq:

- Hans Enoksenip taamaaliornermigut siulersuisuunerni akisussaaffiit agguataarpai, partiimi illua´tungiliuttut nutaaliorniat nunarsuarmioqataanermillu pingaartitsisut, soorlu Jonathan Motzfeldt aamma Jørgen Wæver Johansen, partiimi oqartussaanerulersillugit. Daniel Thorleifsen naliliivoq.

Aamma isumaqarpoq, Hans Enoksen tullersortissamik toqqagassaarussimasinnaasoq, maannalu akisussaaffiit agguataarnerisigut anguniarsimagunaraa, kukkuluttuutigineqartartut pakkersimaarnissaat.

- Siulittaasoq kukkuluttortoqartillugu maanna oqarsinnaanngorunarpoq, partiimi kikkut tamarmik akisussaasuusut. Daniel Thorleifsen oqarpoq.

Hans Enoksenip Jonathan Motzfeldt siulittaasutut qineqqusaarnermi siornatigut ajugaaffigisimavaa, Hans Enoksenip Jonathan Motzfeldt qanoq tatigisinnaatigaa?

- Partiimi pissutsit taamaatsillugit suleqatigiinniartussaassapput, taamaaliunngikkunik suli annerungaartumik ajornartorsiuteqalissagamik. Hans Enoksen nukittuallattutut oqaatigineqarsinnaanngilaq, partiili nukittuallattutut oqaatigineqarsinnaavoq. Daniel Thorleifsen oqarpoq.

Siulersuisuunerilli qanoq sivisutigisumik atasinnaanerat oqaaseqarfigiuminaatsippai.

- Partiip ataatsimeersuarnissaata tungaanut ataniartussaassapput, partiili taanna nalunartuuvoq kukkuluttortuarlunilu ingerlasarmat qanoq sivisutigisumik atasinnaassanersoq nalunarpoq.

Naalakkersuisuusimasoq Mikael Petersen ulluinnarni aqutsisutut toqqarneqarpoq, toqqarneqarneralu siulittaasup eqqarsaatigilluarsimassagunaraa Daniel Thorleifsen isumaqarpoq.

- Mikael Petersenip misilittagai siulittaasup atorluarniarsimassavai, ulluinnarnilu aqutsinermi sinnersortissamisut eqqarsaatigisimagunarlugu. Daniel Thorleifsen naliliivoq.