Siumukkut inortuipput

Inatsisartut ataatsimiittarfianni sianeq kasunneqarmat Siumut gruppia ullumi amigaataavoq.
Allattoq Jens Thorin
septembarip 17-at 2010 16:47

Inatsisartut silataanni suna tamarmik nuannerpoq eqqissisimanarlunilu. Seqinnarippoq, Kalaallit erfalasui aqqanillit danskillu erfalasuat ataaseq qilammik tungutsuaarimmik tunuliaquteqarlutik erfalarusaarput.

Kisianni inatsisartut siulittasuata Josef Motzfeldtip ukiakkut ataatsimiinneq ammarlugu inatsisartut sianiat kasummagu, Siumup gruppia najuutinngilaq.

Tamanna naliginnaanngilaq. Kisianni Josef motzfeldtip qinngasaarinertut isiginngilaa:

- Ua' taama isiginngilara. Inatsisartut amerlanerussuteqartut aalajangiisinnaallutik inimiikkaangata ataatsimiinnissaq aallatissinnaavara, Josef Motzfeldt oqarpoq.

Kisianni Inatsisartut ukiakkut ataatsimiineranni, Inatsisartut ukioq suliffiata aallartiffiani inatsisartunut ilaasortat taama amerlatigisut siornatigut najuutinngitsoornerannik, naalakkersuinermi pissutsinik ilinniagartooq Jakob Janusen eqqaamasaqanngilaq.

Siumulli siulittasuata Aleqa Hammondip unnerpaa, taamaaliornertik qinngasaarinerunngitsoq.

- Naa, tinnersaasutut taaneqartariaqanngilaq. Aamma taanna allat aalajangertariaqartutut aamma immaqa aperisariaqarsinnaapput, oqarpoq nangillunilu:

- Inatsisartut ataatsimiittarfiannut majuannginnitsinni tamatta katersuuteqqaartarpugut, taasissutissat, qulakkiigassallu assigiinngitsut piariipallallugit.

Kisianni taamaakkaluarpalluunniit taamaaliorneq nalinginnaanngitsutut oqaatigisariaqarpoq.

Josef Motzfeldtip neriuutiginngilaa ammaanermut kingusinaarluni takkunneq, ataatsimiinnerup aporaaffiiulluni ingerlariataarsinnaneranut ersiutaassasoq.

- Tamanna pisussaaffiginngilarput, inatsisartuni innuttaasut qinersisut sinnerlugit inuiaqatigiinnut tunngasunik suleqatigiinneq tamakkiunniartussaavarput. Tunngaviusumik naalakkersuinikkut isumaqatigiinngikkaluarluta qinersisitsinnut aamma inuiaqatigiinnut akisussaaffeqarpugut. Inatsisartut ukiuata aallartinnera tamatta peqataarusussusermik nalunaarnernut najuuttarnissarput pisariaqarpoq.

Atassutip gruppiani marlunnik ilaasortaqartumi siulittaasup, Siverth K. Heilmannip Siumumi ilaasortat kingusissumik isernerat ajornartorsiuterujussuartut uumisaarinertulluunniit isiginngilaa, taamaattorli oqaassuteqarluni:

- Piffissamik ataqqinninneq taanna sumiluunniit takutitsivigissallugu pingaarnerpaajujuaannarpoq, naggasiivoq.