Siumukkut IAp siunnersuutaa taperserpaat
Aamma siunnersuut kommunini iluarsaaqqinnermi siunertamut naleqqutuusoq, Malik Berthelsen tunngavilersuivoq:
- Kommuunit kattussuunneqarneranni siunertanut ilaavoq, kommuunit annertunerusumik akisussaaffeqalernissaat, taamalillutik kommuunit namminneerlutik pingaarnersiullutik sanaartugassanik immikkoortiterisinnaaniassammata. Taamaaattumik siunnersuut akornutissaqartinngilarput, Malik Berthelsen oqarpoq.
Kommuneqarfik Sermersuumi borgmesteri, Asii Chemnitz Narup, isummamut tapersersuilluni siusinerusukkut oqareerpoq. Kisianni sinerissami inissianik sanaartornermi aamma illuutinik pisinermi akit assigiinnginnerujussuat qulaajarneqaartariaqartoq, Asii Chemnitz Narup IAp Sisimiuni ataatsimeersuarnerani oqarpoq.
Sinerissami inissiat akiisa assinngiinnerujussuannik Asii Chemnitz Narup-ip oqartuuteqarnera Siumumit isumaqatigineqartoq, Malik Berthelsen oqarpoq.
Inissiat illuutillu pisiarineqarnerini taakkua pitsaassusaat aallaavigalugit sinerissami tamarmi akit assigiinnerulernissaat anguniarlugu Siumut inatsisartuni ukiarmi siunnersuuteqarpoq.
- Massakkut periuseq malillugu illuutit inissiallu niuerneq malillugu akilersorneqarput, tamatumalu kinguneraa Nuummi inissiat akisoorujussuanngorlugit pisiarineqartarnerat, Malik Berthelsen oqarpoq.
Inissianik illuutinillu ukiuni kingullerni sisamani sanaartornermi nunatsinni illoqarfiit pingaarnersaat naalakkersuisunit salliutinneqartoq Malik Berthelsen isumaqarpoq.
- Naalakkersuisut ukiuni kingullerni sisamani politikkiat malilllugu, aningaasanut inatsimmi sanaartukkanut immikkoortitsisarnerini kukkunngikkuma 67 procentii Nuummut tutsinneqartarput, tamannalu illoqarfiit allat katataanerannik kinguneqarpoq, Malik Berthelsen oqarpoq.
Kisianni sanaartornermut naalakkersuisup, Jens B. Frederiksenip, KNR-imut ullumi oqarnera naapertorlugu kisitsisit taakkua mumingapput. Tassalu sanaartorninnissamut aningaasaliissutit 67 procentii Nuup avataani atorneqartartut.
Nunarput tamakkerluni agguaqatigiissillugu inissaaleqiffiusoq Malik Berthelsen oqarpoq.
- Inuttussusseq aallaavigalugu illoqarfinni allani inissaaleqineq agguaqatigiissitsinermi Nuumminngaanniit appasinnerungaanngilaq, Malik Berthelsen oqarpoq.
Namminersorlutik Oqartussat sanaartornermut aningaasaliissutigisartagaasa kommune-nut nuunneqarsinnaanerat, kommune-mut inatsisartunullu qinersinerup kingorna Kommuninut isumaqatiginniutigineqartariaqartoq, Malik Berthelsen isumaqarpoq.
