Siumukkut avissaartuupput
Naalakkersuisut immikkullu ilisimasallit arlallit assigalugit, Kim Kielsenip aatsitassarsiornermi akuersissuteqarnermut akiliuteqartitsisoqartalerpat, piiaanissamut pilersaarutit suliluunniit aallartinnatik unitsiinnarneqarnissaat ernumanartoqartippaa.
Siumup siunnersuutaanut akerliliinerminut atatillugu Siumup ilaasortaasa ilaanit taperserneqarluni, Kim Kielsenip Atuagagdliutini ullumi saqqummersuni oqaluttuaraa.
- Partiimi ilaasortanit inunnillu nalinginnarnit amerlaqisunit saaffigineqaqattaarpunga, tamakkua siunissaq ungasiartoq eqqarsaatigalugu aatsitassanut atatillugu Nunatta iluanaaruteqarsinnaanera anguniarlugu suliaasimasut qatangiinnartinneqarnissaat aarleqqutigaat, Kim Kielsen oqarpoq, taanna naalakkersuisut siuliini aatsitassarsiornermut naalakkersuisuuvoq.
Taamatut oqaaseqarnini pissutigalugu Siumumit isornartorsiorneqarsimanani oqarpoq.
- Sianerfigineqarlunga naveerneqanngilanga. Aamma tamanna soqutiginngilara. Isumaga annittarpara taannalu Siumup politikkitoqaanut tunngasuusoq, arlaata iluarinngikkuninga anisikumaarpaanga, Kim Kielsen AG-mut ullumi saqqummersumut oqarpoq.
