Siumukkut anguniagassaat
Siumup partiiata ataatsimeersuareernermini immikkoortortaqarfiit siunnersuuteqarnerisigut politikkikkut anguniagassatut siunniussatik pingaarnerit ualimut saqqummiuppaat.
Siumup politikkiani anguniagassatut pingaarnertut siunniussassat qulequttat arlaqartut Siumup ullumikkut Sisimiuni tusagassiortunik katersortitsinermini saqqummiuppai.
Siulleq tassaavoq meeqqat sumiginnakkat pillugit suligasuartitaq pilersinneqarsimasoq, iliuusissanik siunnersuuteqareersoq, Siumup politikkiani suliassatut aallartinneqarnissaat Siumumit oqaatigineqarpoq.
Silaannaap kiatsikkiartornera ilutigalugu aalisartut piniartullu qaammatini makkunani atugarliornerini ikiorserniarlugit, aningaasanik immikkut tapiiffigineqarnissaat Siumup siulersuisuunerinit aalajangiunneqarpoq. Hans Enoksen-ip suli oqaatigisinnaannginnerarpa aalisartoq piniartorlu qanoq amerlatigisunik aningaasanik tunineqassanersoq.
Utoqqaat atugaasa pitsanngorsaaviginissaat anguniarneqarpoq, tassani pineqarluni utoqqalinersiallit ineqarnermikkut allatigullu akiligassarisartagaannik oqilisaavineqarnissaat.
Siunissaq eqqarsaatigalugu Danskisut oqaasillit Namminersornerullutik oqartussat allaffeqarfissuini pisortarineqartut, soraartarnerini atorfinitsitseqqiisarnerni Kalaallinik atorfinitsitsisalernissaq. Tassani nassuiaatigaat Kalaallini atorfeqareersuni ilinniartitseriaatsimik nutaamik pilersitsinikkut iliniartitseqqinnissaq, aammalu Kalaallit ilinniagartoorilersimasaanik atorfinitsitsisarlernissaq.
