Siumukkormiut: Tusagassiortut avissaartuunnermut pisuupput
Siumumi avissaartuuttoqarnera inuiaqatigiissutsimi sukarsuit sisamaata, tassalu tusagassiorfiit kisimik pisuussutigaat, siumukormiut ippassaq Sisimiut timersortarfeeraanni nerersuaqatigiinnerani nipi taannaavoq.
Hans Enoksenili oqarpoq partiip iluani avissaaqqanerit aaqqiiviginiassallugit piareersimalluni.
Siumup partiiata iluani avissaartuuttoqannginnera uppernarsarniarlugu, Sisimiuni bogmesterip Hermann Berthelsenip Siumup ippassaq unnukkut nerersuaaqatigiinnerani oqatigiitigalugu, Hans Enoksen aamma Jørgen Wæver Johansen ersaartaanneqaqisumik eqitaartippai. Hans Enoksenili radioaviisimut oqarpoq avissaartuunnerit aaqqinniarnissaanut ammalluni.
- Neriuppunga ataatsimeersuarnermi tulleriinni pingasuni siulittaasutut naqissuserneqartarnera taasinerni ajorsartunit ataqqineqarluni uagutsinnut illiutissasut, Hans Enoksen oqarpoq. Hans Enoksen aamma oqarpoq ajorsartut pisariaqartikkitik, pikkoreqimmata nukittuujullutillu, neriuutigaalu suleqatiginnikkusunnerat oqaasiinnaanani timitalerneqassasoq.
Tusagassiortunik ullumi katersortitsinermi Hans Enoksenip tusatsiakkat ilumuunnginnerarpai, tassalu Jørgen Wæver Johansen naalakkersuisutut tunuassasoq.