Siumukkormiut saqqummiussissanatik isumaqatigiissutigisimavaat

Matoqqasumik ataatsimiinnernit avammut tusarliussisannginnissaq Siumukkut isumaqatigiissutigisimavaat, naak maleruagassani tamanna pillugu erseqqissumik allassimasimanngikkaluartoq. Simon Olsenip aningaasaqarnermut ataatsimiititaliami siulittaasunngussammat aamma taamaaliorsimallutik, inatsisartuni gruppip siulittaasua Otto Jeremiassen oqarpoq.

Sinerissami siumukkormiut immikoortortaqrfiisa ilaat oqaaseqaqqusinnginneq pissusissamisoorsorineqanngilaq. Ruth Heilmann ippassaq oqarpoq siumup siulittaasuannit oqaqqusaajunnaarsimalluni, tamannali siumup siulittaasuata ilumuunnginnerarpaa.

- Ruth Heilmannip radioaviisikkut oqaaseqareernerata kingorna (tallimanngormat siuliani, aaqq.) sianerfigisimanerarpaa, oqarfigalugulu gruppimi suliat matoqqasut avammut oqaluttuarimmagit nuannarinagu.

Ruth Heilmann oqarpoq Siumup siulittaasuata inassutaa ataqqiniarini, imminermulli tunngasunik oqaluttoqassappat oqaaseqarsinnaasariaqarluni.