Siumukkormiut ilaat qinerseqqusipput

aggustip 24-at 2005 15:12

Tatiginassuseq eqqarsaatigalugu Naalakkersuisut siulittaasuat maanngangaaq qinersinissamik suaarutiginnittariaqaraluartoq, allaallu partiimi siulittaasoq siulittaasuujuassanersoq apeqquserneqartariaqartoq, Qaqortumi Siumup siulittaasua Lars Lundblad oqarpoq:

- Hans Enoksen assut sanngiilliorpoq, eqqarsaatigeqqittariaqarpaalu naalakkersuisut siulittaasuattut ilumut aqutsisinnaanerluni. Qinersinissamik suaarutiginnittariaqarpoq. Naalakkersuisuni pisut innuttaasut aamma qatsuppaat, tatiginassuserlu aanngajussisimasoq malugisimallugu. Lars Lundblad taama oqarpoq.

Aamma qinersisoqaraluarpat, Siumup kinguariangaarnissaa ilimaginagu erseqqissaavoq, kikkut qinigassanngortinnersut apeqqutaasarnerarlugu.

Suliassat pingaarutillit, soorlu aningaasanut inatsisip naammassineqarnissaa eqqarsaatigalugu Naalakkersuisunik taarsiigallarnissaq naammannginnerluni ?

- Aqutsisinnaasunik peqarunik ajunngikkaluarpoq, kisianni aqutsisinnaanngitsumik siulittaasoqarani ajornaqaaq. Lars Lundblad oqarpoq.

Siumup siulittaasuannik Hans Enoksenimik isornartorsiuisut aamma ilagaat Ole Aggo Markussen, imalu naliliivoq:

- Pisoq kanngunartuliorneruvoq annertooq, taamaattumik qinersisitsisoqartariaqaraluarpoq. Naalakkersuisut minnerunngitsumillu naalakkersuisut siulittaasuat imminut ataqqiguni qinersisartut maannakkut aperisariaqarpai.

Ole Aggo Markussen aamma isumaqarpoq, Siumup Inuit Ataqatigiillu siuttuisa maanna isumaliuutersuutigisaat, tassalu naalakkersuisunik toqqaaniarnermi isumaqatigiinniartalernissaq isumaqatigisinnaanngilluinnarlugu.

- Tupinnartuliorneruvoq. Matumani Inuit Ataqatigiit aalajangeeqataasinnaanerat akuersaarneqarsinnaanngilluinnaqqissaarpoq. Naalakkersuisuunertik ima annaakkusussimatigigunikku allaat Siumup tunngaviusorujussuarmik isumaanut anguniagaanullu angummakkusunnera akigineqartutut pissusilersorfigissagunikku taava uninnissamut tunngaviulluassaaq. Ole Aggo Markussen oqarpoq.

Ole Aggo Markussen aamma Lars Lundblad erseqqissaapput, naalakkersuisunngorumanerlutik aperineqassagaluarunik naaggaassallutik.