Siumukkormiu meeqqat atugaannik pitsanngorsaarusuppoq

Imigassamik ikaroornartumillu atornerluineq  annertuumik ajornartorsiutaavoq, ilaatigut meeqqat  30%- iisa angerlarsimaffianni  imigassamik ajornartorsiuteqartoqarpoq, kiisalu meeqqat 10%-iisa angerlarsimaffiini ikiaroornartoq atugaalluni. Angajoqqaat annertuumik atornerluisut meeqqami pisariaqartitaat takusinnaaneq sapertarpaat, taamaalillutillu meeqqaminnik illersuisinnaanerat isumaginnissinnaalerat killeqalersarluni , killormullu meeqqat qatanngutiminnut angajoqqaaminnullu isumaginnittunngorsinnaallutik.

-Ullumikkumut ulloq unnuarlu angerlarsimaviit naleqqunnerusut pigineqalernissaat, kiisalu ilaqutariinnut inissiisarnerit aamma pitsanngorsaavigalugit. Ilaatigut meeqqat nukingernerusumik pitsaasumillu misissorluarneqartalernissaat pisariaqartinneqartoq, Martha Lund Olsen oqarpoq.

Isumaginninnerup iluani sulisoqarniarnikkut sulisorisallu pigiinnarnissaat sivisuumik ajornartorsiutaavoq. Aamma Nunatsinni meeqqat angerlarsimaffiini sullissivinnilu meeqqanik atugarliortunik sullissiviusuni sulisunik ilinniarluarsimasunik amigaateqarpugut, tamannalu Martha Lund Olsenip iliuuseqarfigerusuppaa.

- Isumaginninnerup iluani sulisut pitsaanerusunik atugaqarnissaat sulissutigineqartariaqarpoq. Sulisuusut ullumikkut nukittorsarneqartarnerat annikippallaaqaaq, kiisalu ilisimasanut nutaanut malinnaatinneqartuarnissaq, kiisalu tapersersorneqartuarnissaq  sumiikkaluaraanniluunniit periarfissaqalernissaq pisariaqarpoq. Isumaginninnermi sulisut aningaasarsiaatigut allanut taamatut ilinniagaqarsimasunut nalimmassarneqarnissaat, soorlu ilinniartitsisunut aammalu peqqissaasunut aamma sulissutiginiarpara, Martha Lund Olsen oqarpoq.