Siulliit ullumi angerlartinneqassapput

Kissarneqalerneq, quersukuluneq anersaartorniarnermik ajornakusoorneq aamma niaqorlunneq, tamakkuupput maluginiagassat silikonimik taniinerup kingorna pujoralannguussimasunik najuussuereernermi ippigineqarsinnaasut.

Maniitsumi Brugsenip allilerneqarneranut atatillugu, naqqata iluarsatuunneranut silikoni atorneqarsimavoq, taassumalu aalannguunnera inuppassuarnik najuussorneqarsimalluni.

Tamatuma kingorna, inuit 39-t Nuummi Dronning Ingridip Napparsimmavissuanut misissugassanngorlugit timmisartumik aallarunneqartariaqalersimapput.

- Ippassaq tikikkamik perulunnerannut naleqqiullugu ullaap tungaa amerlanerit pitsanngorsimaqaat. Dronning Ingridip Napparsimmavissuani ullaap tungaani tusagassiortunik katersortitsinermi, Ella Skifte taama oqarpoq.

Ajunaarnersuaqartillugu Dronning Ingridip Napparsimmavissuani piareersimasoqartuarpoq:

- Ajunaarnersuaqarnerani upalugaarsimaneq ajungivissumik immikkoortortat ningiuinit aammalu napparsimmaviup qullersaqarfiata ingerlassimavaat. Aamma Maniitsumi napparsimmaviup ikiueqqaarnera pitsaasumik ajunngivissumillu ingerlanneqarsimasoq nuannaarutigeqaarput, nersualaartariaqarlutillu, Ella Skifte oqarpoq.

Silikonip pujoralannguutsitaanik najuussuereernerup kinguneranik, misissugaritittut 38 - 39-nik kiaqalersimapput, taamaattumillu peruluttorujussuusimagaluartut, Ella Skiftep aamma eqqaavaa.

Taassuma ersqqissaatigaa inuit eqqorneqartut puammikkut nappaammik atugaqareersimanngikkunik ernumassutissaqanngitsut.