Siullerpaaq anginerpaarlu ukiunik 20-inngortorsiorpoq
Nunatsinni erngup nukinganik innaallagissiorfiit massakkut tallimaapput. Kingulleq ammartoq Ilulissap eqqaani Paakitsumiippoq.
Erngup nukinganik innaallagissiorfiit tallimat nunatsinnut sipaarutaapput. Tassa uuliamut aningaasartuutissaraluit katillugit 400 millionit koruuninik nunatsinni ukiut tamaasa sipaartaratsigit.
Utoqqammiut Kangerluarsunnguani innaallagissiorfik Namminersorlutik Oqartussanut milliardimik ataatsimik 1993-imi ammarneqarnerata nalaani naleqarpoq. Taannalu innaallagissiorfik Norskit sanaartortuinit sananeqarpoq - Norgep naalagaaffiata karsianit atornikkut.
Nuummi najugallit 16.000-it ilarpassuisa juullimi ullorissat qulliillu juullerpaluttut ullluni makkunani ikitiersimassavaat. Takorloorneqarsinnaavorlu juullilernera ukiuuneralu peqqutigalugu innaallagissamut atuineq annertoorujussuanngortartoq.
Nunatsinni illoqarfiit pingaarnersaani innaallagiamik pisariaqartitsinerup annerpaartaa erngup nukinganik matussuserneqarpoq. Paulus Hard-ilu oqarpoq, tassanngaanniit innallagissamik ukiut 25-it qaanngiuppata suli taama pilersuitigissasoq takorloorneqarsinnaavoq, aamma illoqarfik marloriaatinngorluniluunnit alliartoraluarpat. Tassami Utoqqarmiut Kangerluarsunnguani erngup nukinganik innaallagissiorfik marloriaamik innaallagialiorsinnaammat.
- Ukiut 25-it qaangiuppata innaallagissamut atuineq milliartornavianngilaq. Massakkut minnerpaamik 45 megawatt sanaartorsinnaavarput taava taamanikkussamut minnerpaamik 100 megawatt sanaartorsinnaasariaqassavarput. Massakkullu napparussuit taakkua 100 megawatt innaallagiaq sanaattorsinnaavaat. Taamaattumik ilimagivara ukiut 25-it qaangiuppata illoqarfik alliartoraluartoq erngup nukinga ingerlaannarnissaa takorloorsinnaaqaara, Paulus Hard oqarpoq.
