Siulittaasuuneq atorluarsiuk

Inuit Issittormiut Siunnersuisoqatigiiffiata ICC-p Danmarkip EU-mut ukioq manna ukiup affaa siulleq siulittaasuunera iluatsillugu isumalluarnartoqarsinnaasoraa. Puisimmi amiinik EU-p niueqqusiunnaarnerata Danmarkip iliuuseqarfigiumaaraa ICC isumalluarpoq.
Allattoq Mads Lynge
januaarip 03-at 2012 08:02

- Issittormiummi inuussutissarsioriaasiannik aningaasatigut taamatut pillaaniarnertut isikkulik kanngunartuliorneruvoq sutigut tamatigut akiugassaq, ICC-p siulittaasua Aqqaluk Lynge ukiortaami oqaaseqaammi ilaatigut allappoq.

Puisit amii pillugit qallunaat pisortatigoortumik akuliunnerat kanngunaannartumik annikippallaartoq, Aqqaluk Lyngep oqaatigaa.

Puisit amiinik EU-p niueqqusinnginnera ilisimatuussutsikkut tunngavissaqanngitsoq, Issittumilu innuttaasunik eqquinerluttoq aamma oqaatigaa.

- Issittumi piniartortagut Europamiunit atugarissaaqisunut naleqqiullugu ilungersorlutik napaniartut aningaasarsiorfissaannik naqisimaneqarput, taamaattumik tunisassiaminnik tunisisinnaannginnertik peqqutigalugu annaasaqarput tamannalu inerteqqutiginnittut, tassa EU-p akisussaaffigisariaqarpaa, Aqqaluk Lynge oqarpoq, inuillu pisinnaatitaaffii pillugit ilungersorneq ukiortaami annikillinavianngitsoq oqaatigalugu.

Puisit amii Kalaallit Nunaanninngaanneersut EU-mut niueqqusiunnaarnermut ilaatinneqanngillat, puisilli amii ataatsimut isigalugit EU-mi piumaneqarnerat annikillisimasoq eqqoriarneqarpoq.