Siulittaasuuffimmik perusupput

maajip 04-at 2005 14:19

Sisimiuni kommunalbestyrelsemut qinersinerup kingorna, Hermann Berthelsen ullaaq radioaviisimut oqarpoq, partiinut allanut suleqatigiissinnaanermut ammallutik.

Agathe Fontain IA sinnerlugu kommuneamut qinigaasoq isumaqarpoq suleqatigiissagaanni ataatsimiisitaliani siulittaasuuffiit ilaannik ataatsimik Siumut tunniussisariaqartoq.

- Tassa soorunami saaffigissavagut suleqatigiinneq qanoq ittoq pineqarnersoq paasiniarlugu. Inuit ataqatigiinni pingaartipparput piviusumik suleqatigiissagaanni tunniussisinnaasariaqarput. Neqerooruteqassappata nalilersorluartariaqassavagut. Aamma isumaqarpugut suleqatigiittut taasaqarniarunik ataatsimiisitaliani siulittaasuuffimmik ataatsimik tunniussisinnaasariaqartut, Agathe Fontain oqarpoq nangillunilu; 2001-mi kommunalbestyrelsemut qinersisoqareernerani, Inuit ataqatigiit siulittaasuuffimmik tunineqarsimanngillat. Piviusorsiortumik suleqateqarniarunik siulittaasuuffimmik tunniussisariaqarput, Agathe Fontain naggasiivoq.

Hermann Berthelsen oqaaseqartinniaraluaratsigu, oqarpoq isumaqatiginninniarnerit suli aallartinngimmata oqaaseqarsinnaanani.