Gade: Siulittaasuuffik asuli tunniunnavianngilarput
Aleqa Hammondip danskit naalakkersuisuisa siunnersuutaasa taasissutigineqarnerini itigartitsinnginnissamik neriorsuineratigut Folketingip Kalaallit Nunaannut tunngasunut ataatsimiititaliaani Venstrep siulittaasunngortippaa.
Isumaqatigiissutaavorlu Folketingimut ilaasortamut nunatsinneersumut Venstremullu pitsaasoq, gruppimi siulittaasoq Søren Gade (V) taama oqarpoq:
- Imaassinnaavoq siulittaasuuffiup tunniunneqarnera nalinginnaasuunngitsumik pisoq, ataatsimiititaliamili siulittaasup Kalaallit Nunaanneersuunera pissusissamisoortutut isigaara. Kisianni soorunami sianiitsuunngilanga.
- Siulittaasuuffimmi imaaliinnarlugu tunniutinngilara.
Politikeri Venstremeersoq Marcus Knuth sisamanngornerup tungaanut siulittaasuugaluarpoq, isumaqatigiissuteqarnermili taanna pilliutigineqarpoq, isumaqatigiissummilu tassani Hammondip danskit naalakkersuisuinik uppititsissanani neriorsuutigaa. Søren Gadep oqarneratut "inuiaat kalaallit ataqqillugit" isumaqatigiissuteqartoqarpoq:
- Kalaallit Nunaata namminiilivinnissaa ilungersorluni sulissutigaa isumaqarlunilu Kalaallit Nunaanni pissutsit Danmarkimit akuliuffigineqassanngitsut. Danmarkimi pissutsinut kalaallit akuliuttariaqannginnerinik aamma isumaqarpoq.
Aleqa Hammond Folketingip kreditkortianik atuisimanini pissutigalugu partiimit Siumumit aggustip qaammataani ilaasortaajunnaarsinneqarnermi kingorna Folketingimi attaviitsunngorpoq.
Naalakkersuisut siulittaasuattut ukiup aappaa avillugu atuutereerluni 2014-imi tunuartariaqalerpoq, taamanimi paasineqarmat pisortat aningaasaataannik 100.000 koruunit sinneqartunik imminut atuisimasoq.
Hammondip siulittaasutut toqqarneqarnerata inuit ilaannit eqqumiigineqarsinnaanera pillugu Søren Gade aperineqarami ima akivoq:
- Imaappoq, ukiut sisamakkuutaarlugit qinersinikkut naliliiffigineqartarpugut, tamannalu aamma Hammondimut atuuppoq.
- Qinersisoqarpat Kalaallit Nunaanni qinersisartuminit akisussaatinneqarluni naliliiffigineqassaaq, taakkulu Folketingimiiginnarnissaa kissaatiginerlugu isummerfigisassaraat. Tamannalu uanga akuliuffigisinnaanagulu akuliuffigerusunngilara.
Apeqqut: Partiit talerperliit ullumikkut nukittunerusumik inissisimalerpat?
- Uanga taamatut eqqarsaatiginngilara. Naalakkersuisut pitsaasumik toqqammavissaqarput, aamma Folketingimi Dansk Folkepartiimit tapersersorneqarluta pitsaasumik toqqammavissaqarpugut pitsaasumillu suleqatigalutigit.
- Politikerip Kalaallit Nunaanneersup isumaqatigiissuteqarfiginera ataaseq kisiat aallaaviginagu politikkerisarput aallaavigalugu danskit naalakkersuisui ingerlaqqissapput.
/ritzau/
