Hans Enoksen, siulittaasutut erngertumik tallimanngormat kingullermik tunuarmat, immikkut ittumik oqarasuaatikkut arfininngorpat ataatsimeersuartoqassaaq.Assi: KNR

Siulittaasussamik suli sassartoqanngitsoq

Naleraq arfininngorpat ataatsimeersuassaaq. Pele Broberg innersuunneqaruni aatsaat sassassaaq. Jens Napãtôk, partiimini siulittaasutut sassassanerluni maanna akerusunngilaq.

Naleraq, Inatsisartuni sisamanik ilaasortaatitalik arfininngorpat siulittaasortaassaaq. Nuimasulli marluk siulittaasunngorusussanerlutik suli nalunaanngillat.

Pele Broberg, partiini sinnerlugu Naalakkersuisunut arlaleriarluni ilaasortaasartoq, parteeqatiminit siulittaasutut innersuunneqaruni aatsaat sassassaaq.

- Innersuunneqassaguma uanga soorunami tamatigut ujartueqataassaanga suleqataanissamut. Nukittunerpaamik Naleraq inissinnissaanut peqataasinnaassaguma tamaviaaqataassaanga, Pele Broberg oqarpoq.

AAMMA ATUARUK Hans Enoksen partii siulittaasuattut tunuarpoq

Naleqqami politikkikkut oqaaseqartartoq, Jens Napãtôk, partiimini siulittaasutut sassassanerluni maanna akerusunngilaq. Taassumali siulittaasumik ataasiinnarmik, ataatsimoorfiusumik, sassartoqarnissaa neriuutigaa

- Neriuutigilluinnarpara taamatut 23-nik ataatsimoorfigineqartumik siulittaasumik arfininngorpat ivertitsissasugut, Jens Napãtôk KNR-mut oqarpoq.

Siulittaasuugallartoq piukkunneqartoq

Taassumali neriuutaata piviusunngornissaa ilimanaaatikippoq. Maanna siulittaasuugallartoq, Ruttsi Lynge Lennert, partiimut ilaasortat ataasiinnarmik qinigassaqassagaluarpata, unammillernissaminut siulersuisuunernit piukkunneqarsimalluni KNR-mut siusinnerusukkut oqarpoq.

- Taamatut kajumissaarneqarpunga siulersuisuunerninngaanniit, Ruttsi Lynge Lennert oqarpoq.

AAMMA ATUARUK Naleqqami siulittaasumik arfininngorpat taasisoqassaaq

Jens Napãtuup oqarnera naapertorlugu Naleqqami siuttunngortussaq, politikkikkut siammasissumik sulisinnaasariaqarpoq. Nunattalu USA-mit Kina-miillu alaatsinaanneqaraluttuinnarneranik paasisimasaqartuusariaqartoq taanna oqarpoq.

- Ukkatarineqarnerput inuussutissarsiornikkut. Naalagaaffinngornissatsinnut toqqammavissat. Iluatinnartorujussuit takkuttut nukittuffigalugit inissisimaffigisariaqarpai, Jens Napãtôk Aasarpalaamit apersorneqarnermini oqarpoq.

Najussanngitsut

Hans Enoksen, siulittaasutut erngertumik tallimanngormat kingullermik tunuarmat, immikkut ittumik oqarasuaatikkut arfininngorpat ataatsimeersuartoqassaaq.

Tassani Inatsisartunut, partiimi siulersuisuunernut sineriammilu immikkoortortaqarfinnut ilaasortat katillutik 23-t peqataassapput.

Aviisimi AG-mi aaqqissuisup, Christian Schultz Lorentzenip, Jens Napãtôk Pele Brobergiluunniit siulittaasunngussasoq ilimagaa.

Inatsisartunut siorna qinersinermi Pele Broberg 550-nik qinerneqarpoq. Jens Napãtôk 324-nik qinerneqartoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl