Siulittaasussamik qinersinissaq naligiissaqaaq

Taanna apeqquterujussuaq maajip ulluisa 30-anni nuna tamakkerlugu Nuummi ataatsimiissutigineqassaaq. Kinalu siulittaasunngussanersoq aalajangerneqassalluni.

Inuit Ataqatigii immikkoortortaqarfiini siulittaasut qulit paasiniaaffigaagut kina piukkunnartinneqarnerunersoq.

Kina Inuit Ataqatigiinni siulittaasunngussanersoq malunnartumik nalornissutigineqarpoq. Pimorussaanngitsumillu apersuinitsinni paasivarput amerlanerussuteqalaartut Sara Olsvig, Inuit Ataqatigiinni siulittaasutut piukkukkaat.

Immikkoortortaqarfinni siulittaasuni apersukatsinni qulini tallimaasut Sara Olsvig siulittaasussatut piukkuneruaat. Pingasut Aqqaluaq B. Egede piukkunneruaat. Marlullu kina piukkunnerunerlugu taasinnanangilaat, tamarmik piukkukkamikkit.

Apersukkatsinni malugiakkatta ilagivaat siulittaasussatut piukkunaateqartut marluk assigiinngitsunik piginnaasaqartut. Taakkulu marluk nukittuutut oqaatigineqarput. Marluullutillu siulittaasussatut piukkunaateqarluartut.  

Immikkoortoqarfinni siulittaasut ilaasa oqaartigaat Aqqaluaq B. Egede, inuiaqatigiinnut attaveqarluartutut, inuiaqatigiillu paasisinnaasaannik oqaluttattoq, illoqarfinnut nunaqarfinnullu siammasinnerusunut attaveqarluarluni. Politikkikkut misilittagaqarluartutut aamma oqaatigineqarpoq. Ilaasalu oqaatigaat Hans Enoksenimut assingulluni uummateqarfigisani oqariartuutigisarai. Taamaakkaluartorli nunanut allanut attaveqarpallaanngitsutut oqaatigineqarluni, qaffasissumillu ilinniagaqarsimanngitsutut.

Sara Olsvigillu ilinniarluarsimanera nersulaarutigineqarpoq, Nunattalu nunarsuarmut qanoq attaveqartinnissaa ilisimasaqarfigalugu. Oqaatigineqarlunilu suliani aallullugit ingerlattarai, sassarniutigiinnarlugulu sassarneq ajorluni. Folketingimi ilaasortaanera aamma ajunngequtissatut isiginiarneqarpoq.
Immikkoortoqarfinni siulittaasut ilaasa oqaatigaattaaq Sara Olsvigip nunarput pillugu angorusutani pimoorullugit sorsuutigisarai.

Inuit Ataqatigiit maajip ulluisa 30-anni ataatsimeersualerunik siulittaasussaminnik qinersissapput.