Kalaallit meeqqat inuusuttuaqqallu Danmarkimut efterskoleriartartut ukiumut 300-t missaanniittarput. Taakkunanngali arfiniliugaangata ataaseq atuarneq naammassinngitsorluunniit angerlaannartarpoq. Unitsitsiinnartarnermut pissutaasut Danmarkimi Efterskoleforeningip siulittaasuata tupaallaatigaa. Assi suliummit ”Allu”-meersuuvoq, suliniummi tassani kalaallit efterskolertut sapaatip-akunnerata naanerini naapittarput.

Efterskolit: Siulittaasup unitsitsiinnartut pissutaat tupaallaatigigai

Kalaallit Danmarkimi efterskolertut arfiniliungaangata ataatsip unitsitsisarnermut pissutigisartagaat, Efterskoleforeningimi siulittaasup tupaallaatigaa. Atuartut ataasiakkaat Danmarkimut efterskoleriartortariaqanngikkaluartut taanna isumaqarpoq.

- Ilumut tupaallaatigaara.

Danmarkimi Efterskoleforeningip siulittaasua, Torben Vind Rasmussen kalaallit efterskolertut arfiniliugaangata ataatsip Danmarkimi atuarnerminik naammassinninngittarneranut pissutaasartut nalunaarusiami atuareerlugit taama oqarpoq.

Danskit efterskoliini unitsitsiinnartartut

Kalaallit ukiuni atuarfiusuni atuartut:

2016/17: 17 procent
2017/18: 15,4 procent
2018/19: 17,2 procent

Ukiuni atuarfiusuni danskit atuartut:

2016/17: 11,2 procent
2017/18: 11,3 procent
2018/19: 10,7 procent 

Tigusiffiit: Danmarkimi Efterskoleforeningen, Peqatigiiffik Kalaallit Meerartaat

Tamanna nalunaarusiami Peqatigiiffit Kalaallit Meerartaannit suliarineqartumi allassimavoq.

Kalaallit atuartut tarnikkut ajornartorsiutit toqqissisimannginnerlu unitsitsiinnartarnermut pissutaanerpaanerarpaat.

Danskit efterskoliisali unitsitsiinnartoqartarneranut pissutaanerusutut takusartagaannit pissutaasut allaanerupput.

- Toqqissisimannginneq tanikkullu ajornartorsiuteqarnerup annertunerunera tupaallaatigaara. Danskit meerartaannut danskillu efterskoliinut oqaatsitigut unammillernartut angerlaannartoqartarneranut pissutaanissaat naatsorsuutigigaluarpara. Aamma angerlarserneq anitusoralugu, Torben Vind Rasmussen oqarpoq.

Ataasiakkaat efterskoleriartut ajornartorsiuteqangaatsiartartut

Taassuma kalaallit danskit efterskoliini atuartut nalinginnaasumik ingerlalluartut erseqqisaatigaa. Kalaallit danskillu atuartut amerlasuutigut naapilluartarsorai.

Efterskolefereningip kalaallit atuartut unitsitsiinnartartut ikilisinnissaanut Kalaallit Illuutaat, Namminersorlutik Oqartussat Danmarkimilu kalaallit peqatigiiffii ukiuni qassiiusuni suleqatiginiartarpai.

AAMMA ATUARUK Kalaallit efterskolertut 17 procentii unitsitsiinnartartut

Naak unitsitsiinnartartut ukiuni kingullerni tallimani 20-nit 17-inut ikiligaluartut Torbern Vind Rasmussenip kalaallit efterskoleriartortut tamarmik danskit efterskoliini inerinngitsoortartut nassuerutigisinnaavaa.

Pingaartumik aallannginnerminni tarnikkut ajornartorsiuteqareersut.

- Qaqugukkut efterskolernerminnik naammassinnissinnaanerannut killeqarsoraara. Immaqa kalaallit atuarfiinut ilaquttanullu atassuteqarnitsinnut pikkorinnerusariaqarpugut – oqarluta inuusuttut tarnikkut ajornartorsiortut immaqa efterskoleriassanngitsut, efterskoleforeningip siulittaasua oqarpoq.

Meerarmi Danmarkimut nuunnissaminut unammillerluarsinnaasutut misiginngikkaangami iluatsitsivallaarneq ajorpoq. Inuttut ajornartorsiutit nooqataasarput amerlanertigullu paatsoornartarlutik. Pisullu ilaanni sakkortunerusumik pisoqartarluni.

- Efterskolernertik naammassinngikkunikku meeqqap inuunermini pakatsissutaanut ilanngutiinnassaaq. Tamannalu nalaatsissinnaanngilarput, Torben Vind Rasmussen oqarpoq.

Nalunaarusiami unitsitsiinnartut amerlanerpaartaat niviarsiaraasut inerniliissutip ilagaa.

Tamannalu sumik pissuteqavinnersoq uppernarsarneqanngilaq. Efterskoleforeniingilli niviarsiaqqat nukappiaqqanit inuuniarnikkut assoroornerusartut maluginiarsimavaa.

- Efterskoleni nukappiaqqat niviarsiaqqanit ukioq ataaseq nipaassinnaanerusut immaqa kulturerivarput. Kalaallit atuartut danskinit atuartunit nipaannerusut misilittagaqarfigaarput. Taamaammat niviarsiaqqat kulturimut ataqatigiinnissamut oqalunnerujussuaqarneranut akuulernissartik immaqa nukappiaqqanit ajornarnerutittarpaat, Torben Vind Rasmussen oqarpoq.

Kalaallit atuarfiisa peqatigiiffiillu qaninnerusumik suleqatigiinnissaat

Taamaammat danskit efterskoliisa, Namminersorlutik Oqartussat nunatsinnilu meeqqat atuarfiisa atuartup angerlarsimaffik qimallugu, ungasissumut aallarluni atuariartornissani piareersimaffigineraa isiginiarnerusariaqaraat, siulittaasoq isumaqarpoq.

Tamanna atuariarnissamut qinnuteqartoqannginnerani atuartup atuarfiullu imminnut naleqqunnerannik qulakkeeriniarluni skypekkut ilaatigut apersuisoqarsinnaavoq.

Tamatuma saniatigut Efterskoleforeningip kalaallit Danmarkimut atuartut ukiaanerani atuanngiffeqarnerminni danskit efterskolini atuartuuneq pillugu kalaallit atuartut allat oqaluginissaat isumatsialaasoraa. Tassaniinnermi danskisut ilinniartitsinissaq aamma periarfissaavoq.

AAMMA ATUARUK Kalaallit inuusuttut tikilluaqqunerusariaqarpagut

Peqatigiiffik Kalaallit Meerartaat kalaallinut Danmarkimi atuartunut suliniummik ”Allu”-mik iluatsitsilluarnera pissutigalugu isumassarsiaqarpoq.

- Kalaallisut oqaloqatigiissinnaapput, kalaallit piorsarsimassusaanniissinnaapput, illaqatigiissinnaapput, efterskolini allat qanoq unammillernerannik paasisaqarsinnaapput. Namminneq efterskoliminnut uteqqinnissaminnut naammassinninnissaminnullu nukissaanik tuniseqataasarpoq, Torben Vind Rasmussen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat