Siumut-mi siulersuisuunerit immikkut ittumik ippassaq ataatsimiipput, ataatsimiinneq telefonikkut ingerlanneqarluni.
Naalakkersuisut siulittaasuat Hans Enoksen oqarpoq, naalakkersuisunut ilaasortaasimasoq, Jens Napaattooq, siulittaasup tulliatut inissisimanerminit nammineerluni tunuartoq.
Siulersuisup tulliatut inissippoq Inatsisartut siulittaasuat Jonathan Motzfeldt.
Ilassinnissutinut aningaasartuutinik sippuerujussuarluni atuisimaneq Jens Napaattuup tunuarneranut pissutaavoq.
Siulersuisuunerni ilaasortanngorpoq Narsami borgmesteriusimasoq Jørgen Lund, aammalu naalakkersuisunut ilaasortaasimasoq Mikael Petersen ulluinnarni aqutsisutut toqqarneqarluni.
Naalakkersuisut siulittaasuat Hans Enoksen ullaaq-manna aamma oqarpoq, Siumut-p Sisimiuni ataatsimeersuarneranut februaarimi ingerlanneqartumut atatillugu, immikkoortortaqarfiit ilaasortaanerminnut akiliuteqartarsimannginnerannik ulluni kingullerni oqalunneq tunngavissaqanngilluinnartoq.
- Tamanna ilumuunngilluinnarpoq, naatsorsueqqissaarneq maanna aallartereerpoq, naatsorsuutillu naammassingajalerput, Hans Enoksen Radioaviisimut oqarpoq.
