Siulittaasup nassuiaatai naammaginngilaat

Hans Enoksenip ileqqorissaarnissamik apeqqut pinnagu Simon Olsenip Aningaasaqarnermut Ataatsimiititaliami siulittaasunngornera unioqqutitsinertaqannginnerarpaa, tusagassiorfiillu kingumut pisuutippai Siumumi eqqissiviilliornermut.

- Simon Olsenip oqaluuserineqarneranut tusagassiuutit annertuumik sunniuteqarput, immikoortortaqarfiillu tamatuminnga sunnertissimapput. Tusagasiorfiit Siumup ingerlanneqarneranut annertuumik akornutaasinnaasunik soqutiginnillutik ingerlatsisarmata nutaarsiassaanngilluinnarpoq, Hans Enoksen immikkoortortaqarfinnut nassuiaammini ilaatigut allappoq.

Hans Enoksenip Siumup immikkoortortaqarfiinut allagaiIlulissani Paamiunilu immikkoortoqartaqarfinnut isummerfigitippagut.

- Naalakkersuisumik tunuartitseriarluni ataatsimiititaliami siulittaasunngortitsineq ileqqorissaarnerunngilaq. Simon Olsenip inuttaa pineqanngilaq, kisiannili periuserineqarsimasoq ileqqorissaarnerunanilu pissuserissaarnerunngimmat uparuarparput, Palle Jeremiassen Kunnak Lorentzenilu oqarput. 

Tusagassiuutit kingumut pisuutinneqarnerat pillugu Kunnak Lorentzen oqarpoq Siumumi pisut inuiaqatigiinni tamarmiusunit soqutiginaateqarmata soorunami ammasumik sammineqartariaqartut, tusagassiuutillu suliassartik ajunngitsumik suliarigaat.