Siulittaasup isornartorsiorneqarnini illuatungilerpaa
Aningaasaqarnermut Ataatsimiititaliami Siumut sinnerlugu ilaasortaq, Per Berthelsen, partiini tunuliaqutsiullugu oqarpoq, Naalakkersuisuutitaaqartut Aningaasaqarnermut Ataatsimiititaliami ilasortaatitaat kisermaassiniartuusut Naalakkersuisunullu naalattussiaannaasut.
Taama isornartorsiuineranut pissutaavoq, ataatsimiititaliami amerlanerussuteqartut tallimanngormat ataatsimeereernermi tusagassiutinut allagaqarmata, Air Icelandimut isumaqatigiissumik akuersaartumik, taamaattorli ikinnerussuteqartut tassalu Siumumeersut Per Berthelsen Finn Karlsenilu isumaat nalunaarutiginagu.
Tamanna ileqquua?
- Imaanngilaq Per Berthelsen isumaqataanani anippat suliarput unitsissagipput, taamaattoqarsinnaanngilaq, tusagassiuutinut nalunaaruterput pineqartunit peqataaffigineqanngilaq, taamaattumik pingasuulluta uagut atsiorpugut, Olga P. Berthelsen oqarpoq.
Kisianni Per Berthelsen oqarpoq, nammineq anilluni, Naalakkersuisut akissutaat naammannersoq naammannginersorluunniit ataatsimiititaliap oqaluusereqqinnissaa kissaatiginngimmagu.
Tassalu aningaasaqarnermut naalakkersuisup Maliina Abelsenip allannguutit nalunaarutai pillugit Olga P. Berthelsen, Andreas Uldum kiisalu Juliane Henningsen naammagisimaarinnipput.
Naalakkersuisuutitaqartut aningaasaqarnermut ataatsimiititaliami ilaasortaatitaat Siumup tusagassiuutinut nalunaarutaani anngaaginnartutut taaneqarput.
- Uagut taama isumaqanngilagut aamma kisermaassingilagut, ataatsimiinnissami eqqartugaassagut tamarmik qaqinneqarput, aamma nerriviup ataanut ilioraasoqanngilaq, kisianni peqataaffigiumaneqanngilaq, aningaasaqarnermut ataatsimiititaliap siulittaasua Olga P. Berthelsen oqarpoq.