Siulittaasunngunngikkuni qinersisitsiniarpoq
Hans Enoksen Siumumi siulittaasutut qinigaanngitsuussagaluaruni, Inasisartunut ikerinnakkut qinersinissamik nalunaaruteqarniarluni ataatsimeersuartunut nalunaarpoq.
Hans Enoksen-ip siulittaasutut qinigaanngitsuussagaluarnini qinerseqqusinertut paasisariaqarsoraa. Siornagut uppiseriarneqartarsimanini kiisalu akit ukioq manna assigiikkunnaarmata tunuaqquneqartarsimanini taama nalunaaruteqarnerminut Hans Enoksen-ip patsisilersuutigai.
Hans Enoksen-ip siulittaasussatut sassarnerminut atatillugu oqaasii siorasaarinertut paasisariaqartut, siulittaasussamullu sassartutut qinersinissamik taamatut nalunaarutiginninniarnera kusanaatsoq akuersaarneqarsinnaagitsorlu,
siulittaasussamut sassaqataa Jørgen Wæver Johansen oqarpoq.
Inatsisartuni qinersisarnerni ilaasortaasut 40 procentii taarserneqartarput, tamannalu pillugu Hans Enoksen-ip taama nalunaaruteqarnera siulittaasussamik qinersinissamut sunniuteqanngitsoornavianngitsoq, Inatsisartunilu ilaasortaareersut qinigaanngitsoornissaminik ilimasuttut Hans Enoksen-mik taaserusunnerussasut Jørgen Wæver Johansen oqarpoq.
Siulittaasussamut qineqqusaartut qineqqusaarutitik ullumi saqqummiutissavaat, siulittaasumillu aqagu arfininngornermi qinersisoqassaaq.