Siulittaasunngortitsineq isorineqaleraluttuinnarpoq
Siumut sinnerlugu Nalakkersuisuni ilaasortaasimasup Simon Olsenip Inatsisartut Aningaasaqarnermut Ataatsimiititaliaanni siulittaasunngortinneqarneranut atatillugu, Siumut sinerissami immikkoortortaqarfiinit isornartorsiuisut ilaqqipput. Taakualu saniatigut partiip naalakkersuisooqataasup Inuit Ataqatigiit immikkoortortai isornartorsiuisunut aamma ilanngupput.
Siumut Ilulissat nunaqarfiani Oqaatsuni immikkoortortaqarfiata Simon Olsenip Aningaasaqarnermut Ataatsimiititaliami siulittaasunngortinneqarneranut atatillugu sut akuersaarneqarsinnaangitsutut nalilerpai
- Ulluni kingullerni pisut aallaavigalugit oqartariaqarpugut Kalaallit Nunarput kisermaassilluni ingerlatsivinngortoq. Tamanna ingasagineqarsinnaagaluartoq, kisianni tassa tamaappoq, tassa imaaliinnartalisanerluta atorfitsinnik taarserneqarlutalu igitaalluta oqaannartarutta taava atorfimmik allamik tunineqassaagut, Oqaatsuni Siumut immikkoortuata siulittaasua Edvardt Frederiksen taama uparuaateqarluni allappoq, tamannalu pillugu Naalakkersuisut siulittaasuata Hans Enoksenip erseqqarissumik nassuiaateqarnissaa piumasarigitsik Edvardt Fredriksen allappoq. Siumut immikkoortortaqarfiinnaanngitsoq aammali Inuit Ataqatigiit Qeqertarsuup tunuani immikkoortartaqarfiinit pisut akuersaarneqarsinnaanngitsutut nalilerneqarput.
-Partiip Siumup naalakkersuisunut Inatsisartunullu ilaasortaasa akornanni Aningaasanut Ataatsimiititaliamut siulittaasussamik tatiginarnerusumik soqarsimanngippat, taava naalakkersuinikkut suleqatit aamma tatiginassuseerussimassapput, Qeqertarsuup tunuani Inuit Ataqatigiit isumasioqatigeeqqammersut isornartorsiuinerminni tunngavilersorput.
Qeqertarsuup tunuani Inuit Ataqatigiit IA-p siulersuisuunerinut kissaateqarput Aningaasanut Ataatsimiititaliami siulittaasunngortitsinermut atatillugu pisunut nalilersueqqillaqqusillutik.
- Massakkut qinersinissaq perusunnanngikkaluaqaaq, taamaattorli pisut uppernassutsimik taama qinersisartut tungaannut innarliitigisut qaangiinnarneqarsinnaanngillat, nunarsuatsinni demokratii malillugu ingerlatsinermi tamanna ileqquunngimmat, Qeqertarsuup tunuani Inuit Ataqatigiit isumasioqatigiittut sinnerlugit Aasianni IA-ip siulittaasua, Johan Joelsen oqaaseqaammini taama tunngavilersuuteqarpoq.
Qeqeratarsuup tunuani Inuit Ataqatigiit immikkoortortaasa nalilersueqqeqqusillutik kisaataannut IA-ip siulittaasua Josef Motzfeldt, ulluni makkunani Københavnimiittoq oqarasuaatikkut ima akissuteqarpoq:
-Immikkoortortaqarfiit taama arlaqartigalutik aammali tupigusuinnaratik akerliusunut ilanngunnerat uagutsinnut tupinnanngilaq. Taamaattorli naalakkersuisooqatigiinnermi nalinginnaasumik isumaqatigiissutaasoq tassaavoq, partiit naalakkersuisooqataasut ataasiakkaat kikkunnit sumilu sinniisoqassanerlutik namminneq aalajangertassagaat, naalakkersuisooqataasunik akuleruffigineqanngitsumik, Josef Motzfeldt nassuiaavoq, Qeqertarsuullu tunuani Inuit Ataqatigiit immikkoortortaqarfiisa uparuaanerat naalakkersuisooqatigiit naalikkersuisooqatigiinnermi toqqammavigisat pillugit qaammatip uuma naannginnerani nalilersuinissaminni ilanngussinnaagaat oqaatigaa.
- Inuttaliisarnermut tunngasut isumaqatigiissutinut ilanngunneqassanersut imaassinnaavoq aamma eqqartorumaarigut, Josef Motzfeldt oqarpoq.
Partiip pineqartup nalilerluareerlugu naalakkersuisooqatiminnut qinersisartunullu tamanna pillugu nalunaaruteqarnissaat naalakkersuisooqatigiinnermut kusanarnerpaassasoq Josef Motzfeldt naliliivoq.
Siumut Uummannami immikkoortoqarfiani siulersuisut Inatsisartut Aningaasaqarnermut Ataatsimiititaliaanni siulittaasunngortitsinermut atatillugu pisut unnugu ataatsimiissutigissagai, Uummannami Siumup siulittaasua Jens Trolle ilisimatitsivoq.