Tunngaviusumik inatsisissaq pillugu isumalioqatigiissitap siulittaasussaatut innersuunneqartup, Ineqi Kielsenip, inuiaqatigiinni amerlanerpaat kissaataat sulinermini aallaagiviniarpai. Kikkulli tamarmik nuannaartissinnaanaviarnagit, taanna oqarpoq.Assi: Maasi Pedersen/KNR

Siulittaasunngorsinnaasoq kikkut tamarmik nuannaarutissaannik sulisinnaasorinngitsoq

Tunngaviusumik inatsisissaq pillugu isumalioqatigiissitap siulittaasussaatut innersuunneqartup, Ineqi Kielsenip, inuiaqatigiinni amerlanerpaat kissaataat sulinermini aallaagiviniarpai. Kikkulli tamarmik nuannaartissinnaanaviarnagit taanna oqarpoq.

Ineqi Kielsen tunngaviusumik inatsisissaq pillugu isumalioqatigiissitamut siulittaasunngussaguni suliaq naammassisinnaassallugu oqarpoq.

Siulittaasutut Naalakkersuisunit akuerineqassaguni sapinngisamik amerlanerit kissaataat tunngavigalugit suliniarpoq, sulialli inernerata tamanit nuannaarutigineqarnissaa naatsorsuutiginngilaa.

- Kikkut tamarmik nuannaarutissaannik sulisinnaassallunga naatsorsuutiginngilara. Kisianni inuiaqatigiinni amerlanerpaat tunngaviusumik inatsiseqarnikkut sullinneqarsinnaanissaat siunissamut qulakkeerusullugu suliassaq una tiguara, Ineqi Kielsen oqarpoq.

AAMMA ATUARUK Ineqi Kielsenip tunngaviusumik inatsisissaq pillugu isumalioqatigiissitamut siulittaasuunissaa inassutigineqartoq

Taassumalu siulittaasunngornissaanut Siumumit inassut Naalakkersuisunit akuerineqassappat, isumalioqatigiissitap sulinera piffissaliussamut naammassissasoq, Ineqi Kielsen oqarpoq.

- Nammassavara naammassinissaa tikillugu. Tunngaviusumik inatsisissat suliarineqartussat Inatsisartunut aappaagu ukiakkut saqqummiunneqartussat piffissaq eqqortoq aallaavigalugu tunniunneqarumaarput, Ineqi Kielsen oqarpoq.

Ineqi Kielsen 26-nik ukioqarpoq, Siumumullu ilaasortani misilittagaqarnerpaajunani. Nunattali siunissaanut suliat pingaarnersaat ilaanniittoq naammassisinnaassallugu oqaatigaa.

AAMMA ATUARUK Doris J. Jensen Tunngaviusumik inatsisissaq pillugu isumalioqatigiisitamit tunuartoq

- Nammattagara atortunik ulikkaartoq atorlugu. Taavalu aamma inuit attaveqaatikka atorlugit ingerlaneq pissaaq. Aamma soorunami ilisimatuussutsikkut periutsit assigiinngitsut atorlugit suliaq ingerlanneqartussaavoq, siulittaasutut innersuunneqartoq oqarpoq.

Taanna Inatsisartunut 2018-imi qinersinermi Folketingimullu siorna qinersinermi inatsisartunut taakkununnga ilaasortanngornissaminut naammattunit qinerneqanngilaq. Inatsisartunulli 2014-imi qinersinermi 224-nit qinerneqarluni Inatsisartunut ilaasortatut qinerneqarami politikeritut misilittagaqarpoq.

Isumalioqatigiissitamili siulittaasutut sulineq politikeritullu sulineq assigiinngitsuusut taassuma erseqqissaatigaa.

AAMMA ATUARUK Tunngaviusumut inatsisissamut isumalioqatigiissitaq unittooqqasoq

- Suliaq una inuiaqatigiinnut annertuumik tunngasussaavoq, politikkikkuinnaq isummersortarnermut tunnganani. Taamaattumik naatsorsuutigaara, naatsorsueqqissaartarfiit aqqutigalugit, misissueqqissaartarfiit aqqutigalugit inuiaqatigiit amerlanerpaat kissaatigisaat qanoq nassaarisinnaaneripput ujartussallugu.

Siulittaasunngussagunili siullermik isumalioqatigiissitap arlaleriarluni unittoortareersup sulineranut angummaqqaassaaq. Tamatumalu kingorna susoqassanersoq paasinarsiumaarpoq.

- Allannguiniaannarluni siulittaasunngortoqarneq ajorpoq, kisianni allannguinissaq pisariaqassappat, soorunami ammaffigaara.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat