Siulittaasunngorniuttut qineqqusaarutaat
Siumup siulittaasussaatut qineqqusaartut Hans Enoksen aamma Jørgen Wæver Johansen qineqqusaarutiminnik ataatsimeersuartunut siullermeerlutik ulla-tungaa saqqummiussipput.
Hans Enoksen oqalugiaataa misigissutsinut tunnganeruvoq, pingaarnertulu taavaa naalakkersuisoqalermalli aatsaat taamak innuttaasunut qanitsigisoqalersoq.
Hans Enoksen oqarpoq sumiiffiit assigiingitsut naalakkersuisut siulittaasuattut aatsaat taama angalaffigisimallugit, innuttaasullu siuarsaaqataalernerik malugillualersimagaat.
Jørgen Wæver Johansen-ip qineequsaarummini oqariartuutaani ersarinnerit ilagaat innuttaasut akornani ilinniagaqarnerulernissaq, atorfiillu qaffasissut kalaallinit tiguneqartariaqartut. Taasuma saniatigut oqaatigaa aningaasat uninngaannartut amerlavallaartut.
Siumup siulittaasussaatut qinigassanngortittoq Jørgen Wæver Johansen isumaqarpoq aningaasat milliardi koruuninik amerlassusillit nunatta karsiani uninngaannaartut, qallunaallu nunaanni pappialani aningaasanik nalilinni mikiarserneqartut nunatsinni sulisinneqartariaqartut, ineriartortitassat nunatsinni suliarisariaqarmata.
Hans Enoksen-ip qineqqusaarutaa politikkimut samminerusoq aqagu saqqummiunneqassasoq Siumup allattaata Johannes Mathiassen-ip oqaatigaa.
Siulittaasussatut qineqqusaartut pingajuat Godman Petersen, suli Sisimiunut tikissimanngimmat qineqqusaarutaanik ataatsimeersuartut tusagaqanngitsoorput.
