Siulittaasunngorniuttut aqagu saqqummiussisussanngorput
Siumut siulersuisuunerisa aalajangerpaat siulittaasussamut sassartut aqagu saqqummiussisinneqassasut, taamaalilluni SIS-ip Lars-Emil Johansen-illu saqqummiinissap siuartinneqarnissaanik siunnersuutaat akuerineqarpoq.
Siulittaasussamut sassartut ataatsimeersuarnerup ulluisa pingajussaanni qineqqusaarumminnik saqqummiussisussaangaluarput, tamannali utaqqisinneqartariaqanngitsoq, Lars-Emil Johansen isumaqarpoq, ataatsimeersuarnerullu aallartinnerani saqqummiussisoqarnissaa siunnersuutigalugu.
- Tamanna inuttarsuinermik tunngaveqanngilaq, siulittaasussatulli sassartut politikkikkut anguniagassaat ilisimareertariaqarpagut Lars-Emil Johansen oqarpoq.
Siumut inuusuttaani siulittaasunngorlaap Tom Nykjær Schmidtip aalajangertigani Lars-Emil Johansen taperserlugu siulittaasunngorniuttut aamma tusaqqaarusuppai. Siulittaasussatut sassartuni suli pingasuusuni sorleq tapersersorniarneritsik Siumup inuusuttaasa suli oqaatigiumanngilaat.
Siumup Nuummi immikkoorortaani siulittaasoq Lars-Emil Johansen Siumup siulittaasussaatut sassarnianngikkallarpoq, siulittaasumulli sassarsinnaanissaminut pissutissaqarsinnaanini piffissap takutikkumaaraa oqarpoq.
