Siulittaasoqarfiup aalajangiiffigissavaa
Royal Greenlandi pillugu eqqissisimananngitsumik oqallinnerujussuaq inatsisartuni nassuiaatigineqassanersoq inatsisartut siulittaasoqarfiani ullumi aalajangerneqassaaq. Siulittaasoqarfik inatsisartuni nassuiaasoqassappat immikkut oqaluuserisassanngortitsissapput.
Oqaluuserisassanngortitsiniarnermut Atassut Demokraatillu piumasaqalerput, IA-meersup Aqqaluk Lyngep Royal Greenlandi pillugu nassuiaasoqarnissaa kissaatigereeraalu. Aqqaluk Lynge inatsisartut siulittaasoqarfiani aamma ilaasortaavoq.
Suliffeqarfiup nunatsinni annersaasumi Elias Larsen sapaatip akunnerit sisamat qaangiummmatali siulittaasuujunnaarmat, Royal Greenlandimi pissutsit tusagassiorfinni oqallisaaqaat. Inuussutissarsiornermut naalakkersuisoq Johan Lund Olsen naqitani tusagassiorfitsigut oqartinneqarpoq Royal Greenlandip pisortaanera keld Askær soraarsinneqassasoq. Pisunik malinnaasut oqaatiginiartarpaat siulersuisuni paasititsinerluttoqarnera pillugu naalakkersuisoq taamannak oqarsimasoq.
Tamatumalu kingorna paasinarsivoq Royal Greenlandip siulersuisoqarniarnera ajorluinnartoq, ilutigillugulu naalakkersuisut suliffeqarfiup pisortaanik attaveqarniarnerat minnerpaaffianiillluni.
Attuumassutillit assigiinngitsut uppernarsisinniaraluarpaat Royal Greenland pillugu eqqortumik oqalunnertik, maannali apeqqutaalerpoq nunatsinni innuttaasut qinigaannut, innuttaasunullumi pisimasuni eqqortoq nassuiarneqassanersoq.
Nassuiaasoqassappallu politikkikkut kinguneqartitsisoqassanersoq.
Suliffeqarfissuit aqunneqarneranni ilisimaqarluartup nunatsinni ilisimasarput Lise Lyck, København niivernermut ilinniarfissuaniittup Royal Greenlanndimi pisut nalileramigit oqarpoq, susassaqartut assigiinngitsut imminnut attaviginngippallaaramik taamaattoqartoq.
